Bólusetning barnshafandi kvenna við COVID-19

Barnshafandi konur eru ekki sérstakur forgangshópur þegar verið er að bólusetja gegn COVID-19 en ekki er lagst gegn bólusetningu þungaðra kvenna sem þess óska. Sérstaklega gildir þetta um þær konur sem eru með áhættuþætti fyrir meðgöngu, eða sinna störfum þar sem mælt er með forgangsbólusetningu s.s. í heilbrigðisþjónustu.

Það er takmörkuð reynsla af notkun mRNA bóluefnanna (Comirnaty® og COVID-19 Vaccine Moderna®) við COVID-19 á meðgöngu og við brjóstagjöf. Ekki voru gerðar rannsóknir á barnshafandi konum eða konum með barn á brjósti fyrir markaðsleyfisafgreiðslu en fylgst er með vaxandi fjölda kvenna sem hefur þegið bólusetningu á meðgöngu eftir að bóluefnin komu á markað. Dýrarannsóknir benda ekki til þess að hætta geti stafað af bóluefnunum fyrir barnshafandi konur, fóstrið eða barn á brjósti. Ekki er búist við að notkun bóluefnis hjá barnshafandi konum hafi í för með sér meiri hættu en fyrir aðra hópa, frekar en fyrir önnur óvirkjuð (ekki lifandi) bóluefni en mælt er með notkun t.d. inflúensubóluefnis hvenær sem er á meðgöngu. Almenna reglan er sú að þegar verið er að nota ný bóluefni að sýna sérstaka varúð þegar kemur að barnshafandi konum, ekki síst fyrir 12 vikna meðgöngu. Ef kona fær bólusetningu óafvitandi um þungun er ekki ástæða til að rjúfa þungun.


Nánar:


Lyfjastofnun:

  • Comirnaty: https://www.lyfjastofnun.is/lyf/covid-19/comirnaty-biontech-pfizer-2/ 
  • Covid-19 Vaccine Moderna: https://www.lyfjastofnun.is/lyf/covid-19-vaccine-moderna-moderna/ 

Fyrst birt 27.01.2021

<< Til baka