Undanþágur frá kröfum um framvísun vottorðs um neikvætt COVID-19 próf og sýnatöku fyrir flugáhafnir eftir vinnuferðir erlendis

Samkvæmt reglugerð um sóttkví og einangrun og sýnatöku við landamæri Íslands vegna COVID-19 er öllum þeim, sem koma til Íslands og dvalið hafa í meira en sólarhring á síðastliðnum 14 dögum í löndum sem skilgreind eru af sóttvarnalækni sem áhættusvæði, skylt að framvísa vottorði um neikvætt PCR-próf sem ekki er eldra en 72 klst. við byrðingu auk þess að fara í sýnatöku á landamærastöð til greiningar á SARS-CoV-2 veirunni og síðan í sóttkví þangað til niðurstöður liggja fyrir úr seinni sýnatöku sem framkvæma skal 5 dögum eftir komu til landsins.

Hafi ferðamaður við komuna til landsins undir höndum viðurkennt vottorð um fulla bólusetningu vegna COVID-19 eða vottorð sem sýnir fram á að COVID-19 sýking sé afstaðin er honum ekki skylt að fara í sóttkví, en honum ber skylda að framvísa vottorði um neikvætt COVID-próf (PCR-próf eða hraðpróf (antigen)) sem er ekki eldra en 72 klst. við byrðingu. Hafi ferðamaður tengsl við Ísland, skal hann gangast undir annaðhvort hraðpróf eða PCR-próf til greiningar á COVID-19 veirunni á næstu tveimur dögum frá komu til landsins.

Samkvæmt sömu reglugerð er sóttvarnalækni heimilt að veita undanþágu frá sýnatöku og/eða framvísun vottorðs um neikvætt PCR-próf til ákveðinna starfsstétta sem fylgja leiðbeiningum sóttvarnalæknis um vinnuferðir erlendis þ. á m. starfsfólki sem sinnir flutningum á vöru og þjónustu, s.s. flugáhöfnum. Sækja þarf um slíka undanþágu.
Undanþáguna má veita til handa flugáhöfnum flugrekstraraðila með rekstrarleyfi hér á landi auk áhafnarmeðlima erlendra rekstraraðila sem búsettir eru hér með eftirtöldum skilyrðum:

  1. Ferð hafi ekki varað lengur en 72 klukkustundir frá brottför frá Íslandi til komu.
  2. Áhafnarmeðlimir séu með gilt vottorð um bólusetningu eða vottorð um fyrri sýkingu, sjá nánar hér um vottorð.
  3. Áhafnir sem eiga sína aðalbækistöð eða eru búsettar hér á landi hafi ferðast eingöngu í atvinnuskyni og hafi farið í einu og öllu eftir leiðbeiningum vinnuveitanda og sóttvarnalæknis um sóttvarnir.
  4. Áhafnarmeðlimir sem útsettir eru fyrir smiti þrátt fyrir varúðarráðstafanir, hvort sem það er innan fjölskyldu, vinahóps eða í starfsumhverfi verða að virða að fullu leiðbeiningar sóttvarnalæknis um sóttkví og falla þá ekki lengur undir þessi undanþáguskilyrði.
  5. Starfsmenn í þessari stöðu fylgist vel með heilsunni og sérstaklega eftirfarandi:
    • Hósti eða mæði
    • Kvef eða hálssærindi
    • Þreyta, vöðva- eða beinverkir, höfuðverkur
    • Skyndileg breyting á bragð- eða lyktarskyni
    • Hiti, kviðverkir, niðurgangur

Ef einhver einkenni koma fram skyldi viðkomandi fara í PCR próf vegna COVID-19 án tafar og ef sýni er neikvætt þá ráðfæra sig við starfsmannahald um hvort mæta megi til starfa. Ef próf er jákvætt fer viðkomandi í einangrun (sbr. leiðbeiningar sóttvarnalæknis).

 


Fyrst birt 26.01.2021
Síðast uppfært 31.08.2021

<< Til baka