Vottorð um bólusetningu vegna COVID-19 viðurkennd á landamærum til undanþágu á sóttvarnaraðgerðum

(Enska - Pólska - Spænska - Litháíska)

 

Ferðamenn sem framvísa vottorði um fulla bólusetningu (sbr. skilyrði að neðan) eru undanþegnir ákveðnum aðgerðum á landamærum vegna COVID-19.

Þeir sem eru með viðurkennd vottorð um fulla bólusetningu þurfa að framvísa neikvæðu PCR- eða hraðprófi (e. antigen) á landamærum, sem má ekki vera eldra en 72 klst. gamalt við brottför (byrðingu), til að vera undanþegnir sóttkví. 

Ef neikvæðu prófi er ekki framvísað eða ef liðinn er styttri tími en 14 dagar frá seinni bólusetningu (eða frá bólusetningu með bóluefni Janssen) þá þarf viðkomandi að fara í eina sýnatöku við komuna og fylgja reglum um sóttkví þangað til niðurstaða liggur fyrir.

Athugið varðandi sýnatöku við komuna til landsins:
Ferðamenn með sem eru íslenskir ríkisborgarar, íbúar Íslands eða með ákveðin tengsl við Ísland þurfa að fara í COVID-19 próf á innan við tveimur dögum frá komu til landsins þrátt fyrir að framvísa vottorði um fulla bólusetningu og einnig neikvæðu prófi við komuna. Sjá nánar á covid.is og í forskráningu.

Börn fædd 2005 og síðar eru undanþegin framvísun á neikvæðu prófi. Börn fædd 2016 og síðar eru einnig undanþegin forskráningu og sýnatöku. Ef barn ferðast með foreldri/forráðamanni sem fer í sóttkví fylgir barn með í sóttkví en losnar úr henni án sýnatöku, þegar sóttkví foreldris/forráðamanns er aflétt. Ef barn ferðast eitt eða með foreldri/forráðamanni sem er undanþeginn sóttkví er barnið einnig undanþegið.

Allir sem koma til landsins þurfa að forskrá sig á covid.is.

Viðurkennd vottorð á Íslandi:

1. Vottorð um afstaðna COVID-19 sýkingu eða mótefni sem uppfylla skilyrði sóttvarnalæknis.

2. Vottorð um bólusetningu gegn COVID-19 sem uppfyllir eftirfarandi skilyrði:

  • Tungumál þarf að vera íslenska, danska, norska, sænska, enska eða franska. Vottorð á öðru tungumáli má taka gilt ef þýðing stimpluð af löggildum skjalaþýðanda fylgir upprunalegu skjali á einu af tungumálunum sem krafist er.
  • Fornafn og eftirnafn (sambærilegt við ferðaskilríki).
  • Fæðingardagur.
  • Heiti sjúkdóms sem bólusett var gegn (COVID-19).
  • Hvar bólusetning(ar) fór(u) fram (land eða borg).
  • Dagsetning(ar) bólusetningar.
      • Skilyrði er að bólusetningu sé lokið; sjá hér að neðan um fjölda skammta sem þarf og bil á milli fyrir hvert bóluefni. Nóg er dagsetning síðari skammts sé tilgreind.
      • Ef mismunandi bóluefni eru notuð fyrir fyrsta og annan skammt gildir tímabil milli skammta sem á við fyrra bóluefni sem var notað til að bólusetning teljist gild.
  • Útgefandi vottorðs (heilbrigðisstarfsmaður/stofnun).
      • Alþjóðabólusetningaskírteinið (gula skírteinið) þarf að hafa undirskrift og stimpil.
  • Heiti bóluefnis eða bóluefna.
      • Framleiðandi bóluefnis.

 

Bólusetningavottorð tekin gild:

Vottorð sem uppfyllir ofangreind skilyrði eru tekin gild frá öllum löndum og geta verið rafræn eða á pappír, þ.m.t. evrópskt stafrænt COVID vottorð (EU/EEA Digital Covid Certificate; EU DCC) (sbr. reglugerð nr. 777/2021 um reglugerð ESB 2021/953) og Alþjóðabólusetningarskírteini WHO (gula bókin) þegar WHO hefur fjallað um og viðurkennt bóluefni sem skráð er í skírteinið.

Listi yfir viðurkennd bóluefni og tímabil á milli skammta (uppfært eftir því sem ný bóluefni bætast við):

Bóluefni sem hafa markaðsleyfi frá Lyfjastofnun Evrópu (EMA) eða eru samþykkt af Alþjóðaheilbrigðismálastofnuninni (WHO).

  1. Tozinameran-Covid-19 mRNA Vaccine (Comirnaty; BNT162b2) Pfizer/BioNTech Manufacturing GmbH, 2 skammtar, lágmark 19 dagar á milli.
  2. COVID-19 Vaccine (Vaxzevria; ChAdOx1-S) AstraZeneca AB, 2 skammtar, lágmark 4 vikur á milli.
  3. COVID-19 Vaccine (ChAdOx1-S) AstraZeneca/SK Bio, SK Bioscience Co. Ltd, 2 skammtar, lágmark 4 vikur á milli.
  4. COVID-19 Vaccine (ChAdOx1-S) AstraZeneca (Covishield) Serum Institute of India Pvt.Ltd, 2 skammtar, lágmark 4 vikur á milli.
  5. COVID-19 Vaccine (Ad26.COV2-S) Janssen-Cilag International NV (Johnson & Johnson), 1 skammtur.
  6. COVID-19 Vaccine (Spikevax; mRNA-1273), Moderna Biotech, 2 skammtar, lágmark 25 dagar á milli.
  7. SARS-CoV-2 Vaccine BIBP/Sinopharm, Bejing Institute of Biological Products Co., Ltd, 2 skammtar, lágmark 3 vikur á milli.
  8. COVID-19 Vaccine Sinovac-CoronaVac, Sinovac Life Sciences Co., Ltd, 2 skammtar, lágmark 2 vikur á milli.

Landamæraverðir meta hvort vottorð er viðurkennt og kalla til fulltrúa sóttvarnalæknis (heilbrigðisstarfsmann) ef þarf og lokaákvörðun um vottorð er á ábyrgð sóttvarnalæknis.

Ef farþegi framvísar bólusetningarvottorði sem er ekki viðurkennt, þ.e. ef einhver þeirra skilyrða sem er krafist eru ekki fyrir hendi, skal viðkomandi sæta sýnatöku og 5 daga sóttkví sem lýkur með annarri sýnatöku. Ef liðinn er styttri tími en 14 dagar frá seinni bólusetningu (eða frá bólusetningu með bóluefni Janssen) þá þarf viðkomandi að fara í eina sýnatöku við komuna hingað til lands og fylgja reglum um sóttkví þar til niðurstaða liggur fyrir.

Athugið að vottorð viðurkennd á landamærum Íslands til undanþágu á sóttvarnaraðgerðum við komuna til landsins eru ekki endilega viðurkennd af öðrum löndum

Ferðamenn sem framvísa ekki viðurkenndu vottorði um fulla bólusetningu eða fyrri sýkingu og koma til Íslands eftir meira en sólarhringsdvöl sl. 14 daga á áhættusvæðum COVID-19 sbr. núgildandi reglugerð.

  • Framvísa vottorði um neikvætt PCR próf, sem má ekki vera eldra en 72 klst. gamalt við brottför erlendis.
  • Fara í  PCR próf við komuna hingað til lands.
  • Sæta 5 daga sóttkví sem lýkur með annarri sýnatöku (PCR-prófi).

Frekari upplýsingar á covid.is.

 


Fyrst birt 13.01.2021
Síðast uppfært 04.09.2021

<< Til baka