Vottorð um bólusetningu vegna COVID-19 tekin gild á landamærum

Skyldur um sýnatöku og sóttkví eftir ferðalög:
Núgildandi reglur gera ráð fyrir að allir sem koma til Íslands frá áhættusvæðum m.t.t. COVID-19 fari í sýnatöku við landamærin. Í dag eru öll lönd skilgreind sem áhættusvæði. Allir sem koma til landsins þurfa að forskrá sig á covid.is. Frá 12. janúar 2021 þurfa börn fædd 2005 og síðar að fara í sóttkví með foreldri/forráðamanni eftir ferðalag en eru áfram undanþegin sýnatöku. Börn fædd 2005 og síðar sem ferðast ein fara í sýnatöku eftir 5 daga sóttkví eftir komuna. Sjá nánar á covid.is.

Vottorð tekin gild á landamærum til undanþágu á sýnatöku:

  1. Vottorð um fyrri sýkingu af COVID-19:
    Sjá skilyrði sóttvarnalæknis.
  2. Vottorð um bólusetningu gegn COVID-19:
    Hafi einstaklingur við komuna til landsins undir höndum bólusetningavottorð sem gefið er út í EES/EFTA-ríki sem uppfyllir leiðbeiningar sóttvarnalæknis um vottorð. Þær leiðbeiningar er að finna í þessu skjali.

Vottorð á vegum Alþjóðaheilbrigðismálastofnunar (WHO) verða einnig tekin gild þegar WHO hefur heimilað notkun þeirra fyrir COVID-19 bólusetningar og sett hafa verið skilmerki um hvaða bóluefni megi skrá í slík skírteini. Að svo komnu máli er ekki hægt að taka gildar COVID-19 bólusetningar sem skráðar eru í alþjóðlegt bólusetningaskírteini (gulu bókina) þar sem slík skráning er ekki gerð eftir fyrirmælum WHO.

Vottorð má vera á pappír eða á rafrænu formi. Landamæraverðir meta hvort vottorð er gilt og kalla til fulltrúa sóttvarnalæknis (heilbrigðisstarfsmann) ef þarf og lokaákvörðun um gildi vottorðs er á ábyrgð sóttvarnalæknis. Ef farþegi framvísar vottorði sem er metið ógilt, þ.e. ef einhver þeirra skilyrða sem er krafist eru ekki fyrir hendi, skal viðkomandi sæta þeim sóttvarnaráðstöfunum sem öðrum komufarþegum er gert að sæta, þ.e. að gangast undir tvöfalda skimun og sóttkví á milli.

Bólusetningavottorð þarf að uppfylla eftirfarandi skilyrði:

  • Á íslensku, dönsku, norsku, sænsku, ensku eða frönsku.
  • Fornafn og eftirnafn (sambærilegt við ferðaskilríki).
  • Fæðingardagur.
  • Ríkisfang.
  • Númer vegabréfs.
  • Heiti sjúkdóms sem bólusett var gegn (COVID-19).
  • Hvenær bólusetningar fóru fram (dagsetningar)
  • Skilyrði er að bólusetningu sé lokið; sjá hér að neðan um fjölda skammta sem þarf til að bólusetningu sé lokið fyrir hvert bóluefni.
  • Upplýsingar um útgefanda vottorðs (heilbrigðisstarfsmann/stofnun), með undirskrift ef alþjóðabólusetningaskírteinið.
  • Heiti bóluefnis – aðeins er tekið mark á bólusetningu með bóluefnum sem hafa markaðsleyfi í Evrópu (sjá lista hér að neðan)
  • Framleiðandi bóluefnis og lotunúmer.

Bóluefni sem hafa markaðsleyfi í Evrópu: (heiti bóluefnis; handhafi markaðsleyfis/framleiðandi; fjöldi og millibil skammta til að bólusetning teljist fullgild)

  • Comirnaty; Pfizer BioNTech; 2 skammtar með 19-42 daga millibili
  • COVID-19 vaccine Moderna; Moderna Biotech Spain; 2 skammtar með að lágmarki 28 daga millibili

Athugið að þó þessi vottorð séu tekin gild á landamærum Íslands til undanþágu á sýnatöku og sóttkví við komuna til landsins á það ekki endilega almennt við um önnur lönd.

 


Fyrst birt 13.01.2021
Síðast uppfært 20.01.2021

<< Til baka