Leiðbeiningar fyrir starfsemi heilsu- og líkamsræktarstöðva vegna COVID-19

Skv. reglugerð um takmörkun á samkomum, er heilsu- og líkamsræktarstöðvum heimilt að hafa opið fyrir 75% af leyfilegum hámarksfjölda skv. starfsleyfi (ef leyfilegur hámarksfjöldi er ekki skráður má miða við helming þess fjölda sem fataskiptirými gerir ráð fyrir). Börn fædd 2005 eru undanskilin fjölda.

Markmið leiðbeininganna er að hægja eins og unnt er á útbreiðslu COVID-19 sjúkdómsins.

  • Í hverju rými í heilsu- og líkamsræktarstöðvum skulu ekki vera fleiri en að hámarki 50 manns. Þetta gildir bæði í tækjasal og í hóptíma.
  • Allir þátttakendur þurfa að skrá sig fyrirfram til að auðvelda smitrakningu.
  • Hvert rými skal hafa aðgang að salernum sem ekki eru samnýtt af öðrum.
  • Í hverju rými gilda 2 metra nálægðartakmörk.
  • Sótthreinsa skal tæki og áhöld á milli einstaklinga innan hvers tíma.
  • Tryggja skal góða loftræstingu í salnum (með loftræstikerfi og að opna glugga).
  • Á milli hópa skal hafa tíma til loftræstingar og sótthreinsunar búnaðar og snertiflata og tryggja skal að hópar mætist ekki í rýmum hússins t.d. á göngum, í búningsklefa og í anddyri.

Þátttakendur, þjálfarar og rekstraraðilar ber að gæta persónulegra sóttvarna

  • Allir eiga að vera með hreinar hendur og spritta þær við komu á staðinn, eftir snertingu við mengað svæði og eftir að æfingum er lokið.
  • Í sameiginlegum rýmum skal tryggja 2ja metra fjarlægð milli einstaklinga en ef því verður ekki við komið skulu þeir sem eru á svæðinu nota andlitsgrímur.
  • Hver hóptími sé að hámarki 60 mín. og viðvera hvers iðkanda í húsi verði ekki lengri en 90 mín.
  • Búningsklefar mega vera opnir en þar þarf að gæta að nálægðarmörkum og nota grímur ef minna en 2 metrar eru á milli manna.

Hreinsun og sótthreinsun búnaðar

  • Tryggja þarf greiðan aðgang þátttakenda að handspritti, klútum og sótthreinsiefni til yfirborðshreinsunar.
  • Eftir æfingu sótthreinsi allir þann búnað sem þeir notuðu.
  • Rekstraraðilar heilsu- og líkamsræktarstöðva bera ábyrgð á að allur búnaður sé sótthreinsaður milli hópa.
  • Starfsmaður sjái um að þrífa og sótthreinsa snertifleti í æfingasal, salerni, vaska og aðra snertifleti í lok dags og eftir þörfum.
  • Upplýsingaskilti um smitvarnir eiga að vera sýnileg öllum.

Leiðbeiningar þessar verða endurmetnar í síðasta lagi 17. mars 2021




Fyrst birt 12.01.2021
Síðast uppfært 24.02.2021

<< Til baka