Vottorð vegna fyrri COVID-19 sýkingar og mótefna tekin gild á landamærum til undanþágu á sóttvarnaraðgerðum

(Enska - Pólska - Spænska - Litháíska)

Ferðamenn þurfa að forskrá sig á covid.is. Þar er einnig netspjall fyrir spurningar.

Ferðamenn sem framvísa vottorði um fyrri sýkingu (jákvæðu PCR prófi) eða mótefnamælingu sem eru viðurkennd á landamærum eru undanþegnir ákveðnum sóttvarnaaðgerðum vegna COVID-19 skv. reglugerð.

Flugrekandi getur neitað farþega byrðingu ef hann er ekki forskráður eða með vottorð sem er krafist. Ekki skyldi þó synja íslenskum ríkisborgara um flutning.

Ekki með tengsl við Ísland:

  • Þurfa að framvísa neikvæðu COVID-19 prófi á landamærum, sem er ekki eldra en 72 klst gamalt við brottför (byrðingu) erlendis (sjá nánar í hlekk um neikvætt próf).
  • Ef neikvæðu prófi er ekki framvísað þá þarf að fara í eina PCR sýnatöku við komuna á landamærum og sæta sóttkví þar til niðurstaða liggur fyrir.

Með tengsl við Ísland:

  • Þurfa að fara í COVID-19 próf á næstu tveimur dögum frá komu til landsins. Sjá nánar á covid.is og í forskráningu. Má vera PCR próf eða hraðpróf.
  • Þurfa ekki að framvísa neikvæðu COVID-19 prófi við brottför (byrðingu) erlendis.
  • Tengsl við Ísland: Íslenskur ríkisborgari, einstaklingar búsettir á Íslandi eða með atvinnu- eða dvalarleyfi (þ.m.t. umsækjendur um slík leyfi) og einstaklingar sem koma til vinnu eða náms í meira en sjö daga. Einstaklingar sem sækja um alþjóðlega vernd. Þá teljast aðstandendur framangreindra hópa vera með tengsl við Ísland.

Undanþegnir sýnatöku við komuna og að framvísa neikvæðu prófi:

  • Ferðamenn sem framvísa jákvæðu PCR prófi sem er eldra en 14 daga og yngra en 180 daga.
  • Tengifarþegar sem fara ekki út fyrir landamærastöð (flugvöll).
  • Börn fædd 2005 og síðar.
  • Flugáhöfn með tengsl við Ísland í vinnuferð erlendis í 48 klst eða styttra.

Ef minnsti vafi leikur á trúverðugleika vottorðs eða vottorð telst ógilt samkvæmt nánari leiðbeiningum sóttvarnalæknis (sjá skilyrði hér að neðan) er ferðamanni skylt að fara í PCR sýnatöku við komuna og síðan í sóttkví þar til niðurstöður liggja fyrir úr seinni sýnatöku 5 dögum eftir komuna.

Einstaklingur sem getur ekki eða vill ekki gangast undir sýnatöku skal sæta sóttkví í 14 daga.

Brot gegn reglugerð getur varðað sektum eða fangelsi skv. 19. gr. sóttvarnalaga nr.  19/1997 eða 175. gr. almennra hegningarlaga nr. 19/1940.

Vottorð um fyrri sýkingu eða mótefni sem eru viðurkennd á landamærum Íslands:

  • Tungumál: íslenska, danska, norska, sænska, enska
      • Vottorð á öðru tungumáli má taka gilt ef þýðing stimpluð af löggildum skjalaþýðanda fylgir upprunalegu skjali á einu af tungumálunum sem krafist er.
  • Fornafn og eftirnafn (sambærilegt við ferðaskilríki)
  • Fæðingardagur (eða kennitala)
  • Dagsetning sýnatöku / mótefnamælingar
  • Hvar sýnataka / mótefnamæling fór fram (land / borg / heimilisfang).
  • Heiti rannsóknarstofu / útgefanda vottorðs (eða nægar upplýsingar þannig að hægt sé að staðfesta niðurstöður).
  • Tegund rannsóknar (PRC-próf eða mótefnamæling). Engin skyndipróf.
  • Niðurstaða rannsóknar
      • PCR-próf jákvætt fyrir SARS-CoV-2 / COVID-19 sem er eldra en 14 daga
      • Mótefni til staðar með ELSA aðferð* eða tölugildi tilgreint
          • IgG eða IgG og IgM mótefni. IgM eingöngu er ekki tekið gilt.
          • Má vera S eða N prótín.
  • Vottorð getur verið rafrænt eða á pappír
  • Viðurkennd frá öllum löndum

*EIA, ECLIA, ELFA, CMIA, CLIA, CLMIA eru sambærileg próf við ELISA.

Landamæraverðir meta hvort vottorð er viðurkennt og kalla til fulltrúa sóttvarnalæknis (heilbrigðisstarfsmann) ef þarf og lokaákvörðun um vottorð er á ábyrgð sóttvarnalæknis.

Athugið að vottorð viðurkennd á landamærum Íslands til undanþágu á sóttvarnaraðgerðum við komuna til landsins eru ekki endilega viðurkennd af öðrum löndum.

Ferðamenn sem framvísa ekki viðurkenndu vottorði um fulla bólusetningu eða fyrri sýkingu eða mótefni:

  • Þurfa að framvísa vottorði um neikvætt COVID-19 próf, sem má ekki vera eldra en 72 klst gamalt við brottför erlendis
  • Fara í  PCR próf við komuna hingað til lands
  • Sæta 5 daga sóttkví sem lýkur með annarri PCR sýnatöku

 


Fyrst birt 26.11.2020
Síðast uppfært 06.10.2021

<< Til baka