Próf til að greina SARS-CoV-2 kórónuveiru á landamærum

Próf til að greina SARS-CoV-2 kórónuveiru, sem veldur COVID-19, er kjarnsýrumögnun (e. polymerase chain reaction, PCR) þar sem tekið er öndunarfærasýni (nefkoks- og hálsstrok) og leitað að kjarnsýrum (erfðaefni) veirunnar. Fyrir farþega er sem fara í tvöfalda sýnatöku þá er fyrra próf á landamærum við komuna en hið seinna 5 dögum síðar á vegum heilsugæslu. Sóttkví er aflétt ef bæði prófin eru neikvæð.

Fyrir farþega í sóttkví er þó heimilt að dvelja eina nótt nærri landamærum á leið á sóttkvíarstað. Farþegar, sem ekki eru bólusettir eða með staðfesta fyrri sýkingu, þurfa að sæta sóttkví uns niðurstöður úr seinna prófi liggja fyrir, og þeim er bent á að gæta ýtrustu smitvarna og huga að heilsu sinni og annarra. 

Þeir sem eru bólusettir en bólusetningu var lokið innan við 14 dögum fyrir komuna fara í eina sýnatöku og fylgja reglum um sóttkví þar til niðurstaða liggur fyrir.

Neikvæð niðurstaða úr PCR prófi þýðir að veiran greinist ekki. Jákvætt próf þýðir að veiruefni hefur greinst og einstaklingur er smitaður. Þeir sem mælast jákvæðir fara í frekari rannsóknir s.s. mótefnamælingu skv. mati Covid göngudeildar ef ástæða er til að meta hvort um gamalt smit er að ræða eða nýtt virkt smit. Einstaklingur með virkt smit þarf að fara í 10–14 daga einangrun og verður fylgt eftir af heilbrigðisþjónustunni. Þeir sem hafa verið í nánum samskiptum við einstakling með virkt smit þurfa að fara í sóttkví. Smitrakningateymi metur og ákveður hverjir þurfa að fara í einangrun eða sóttkví.

Gert er ráð fyrir að komufarþegar fái upplýsingar um niðurstöðu úr PCR prófi innan sólarhrings, yfirleitt samdægurs eða, sérstaklega ef komutími er eftir kl. 17, næsta dag. Farþegum verður tilkynnt um niðurstöðuna í rakningarappinu, Rakning C-19, og í smáskilaboðum (sms) í gegnum heilsuvera.is. Jákvæðar niðurstöður eru einnig tilkynntar símleiðis í það símanúmer sem var staðfest í forskráningu. Nauðsynlegt er að hægt sé að ná sambandi við alla komufarþega ef tilkynna þarf um jákvæða niðurstöðu úr prófi svo mikilvægt er að hafa virkan síma.

Frá 18. júlí hafa svo ferðamenn með tengsl við Ísland, eins og íbúar Íslands, íslenskir ríkisborgarar o.fl., þurft að fara í sýnatöku innan tveggja daga frá komu til landsins, þrátt fyrir að vera full bólusettir eða með vottorð um fyrri sýking. Þetta próf má vera annað hvort PCR próf eða hraðpróf en þessir ferðamenn sæta ekki sóttkví á meðan niðurstöðu er beðið. Ef hraðpróf er notað og reynist jákvætt er einstakling skylt að fara í PCR próf til staðfestingar og viðkomandi fær sendar upplýsingar um það.

Lífrænum sýnum verður fargað en ópersónugreinanleg gögn verða hugsanlega nýtt til samantektar á tölfræði um COVID-19 sjúkdóminn.


Fyrst birt 09.06.2020
Síðast uppfært 17.09.2021

<< Til baka