Ráðleggingar til ferðamanna

Íbúum Íslands er ráðið frá ferðalögum áhættusvæða COVID-19. Flest lönd eru enn skilgreind sem áhættusvæði vegna COVID-19. Þeir sem ferðast ættu að sýna varúð og fylgja ráðum um hreinlæti og sóttvarnir.

Landamæri Íslands eru opin íbúum og ríkisborgurum EES og Sviss en Ísland fylgir ferðatakmörkunum á ytri landamærum Schengen-svæðisins. Öllum sem koma til landsins er skylt að fylla út forskráningarform fyrir komu til landsins og velja að fara í sóttkví í 14 daga eða undirgangast COVID-19 sýnatöku (PCR-próf). Ef próf er neikvætt er sóttkví undanþegin. Sýnataka fer fram á landamærum en sumir þurfa að fara í aðra sýnatöku 5 dögum síðar. Börn fædd 2005 og síðar eru undanþegin sóttkví og sýnatöku.

Þeir sem velja að fara í sóttkví, skulu halda sig heima í 14 daga eftir að þeir koma til Íslands, sjá leiðbeiningar til einstaklinga í sóttkví. Ef þeir fá einkenni frá öndunarfærum, sérstaklega með hita, skulu þeir hafa samband við sína heilsugæslu símleiðis, hafa samband við netspjall heilsuveru.is eða Læknavaktina í síma 1700. Ekki skal mæta óboðaðir á sjúklingamóttökur.

• Ferðamönnum er ráðlagt að gæta vel að almennu hreinlæti, sérstaklega handþvotti með sápu og vatni.
• Fylgja heimkomusmitgát við komu til Íslands og mæta í aðra sýnatöku fyrir þá sem það á við.
• Handspritt má nota ef ekki er hægt að þvo hendur. Þó skyldi alltaf þvo hendur með sápu og vatni ef þær eru sýnilega óhreinar.
• Forðast náið samneyti við einstaklinga sem eru með almenn kvefeinkenni/hósta.
• Ekki snerta munn, nef eða augu með óþvegnum höndum. Hreinsið hendur aftur eftir að hafa snert andlitið.
• Nota pappír fyrir vit við hnerra og hósta og þvo hendur reglulega. Henda skal pappír eftir notkun. Annars hnerra og hósta í olnbogabót.
• Halda 2ja metra fjarlægð frá öðrum.
• Nota hlífðargrímur þar sem það á við.

Fyrst birt 24.02.2020
Síðast uppfært 10.08.2020