Stunguóhapp

Fíkniefnaneytendur sem sprauta sig í æð henda alltof oft nálum og sprautum á víðavangi, t.d. á leikvelli, göngustíga og almenningsgarða.


Hættan á að barn sem stingur sig á notaðri nál smitist af blóðsmitandi veirum, t.d. alnæmisveiru eða lifrarbólguveiru er sem betur fer ákaflega lítil. Stungan getur samt valdið óþægindum eins og sviða og hún veldur alltaf miklum áhyggjum.

Hvað er hægt að gera til að fyrirbyggja stunguóhapp?

  • Börn ættu aldrei að leika sér berfætt í almenningsgörðum, á leikvöllum eða annars staðar úti.
  • Brýna ætti fyrir börnum að taka aldrei upp nál eða sprautu ef þau finna slíkt á víðavangi og einnig ætti að brýna fyrir þeim að segja fullorðnum frá því að þau hafi fundið slíka hluti.
  • Ef nál og sprauta finnast á víðavangi er mikilvægt að farga þeim eins fljótt og auðið er og með öruggum hætti til þess að draga úr hættu á því að nokkur stingi sig eða fái á sig blóð.

Hvernig er best að farga sprautunál?

  • Að verða sér út um plastílát sem er það hart að sprautunálar geti ekki stungist í gegnum það. Slík ílát eru t.d. gosflöskur.
  • Að láta ílátið á flatt stöðugt yfirborð, eins nálægt nál og sprautu og auðið er.
  • Að reyna ekki að setja hulsu á nálina. Taka upp sprautuna á endanum sem er fjærst oddinum og láta hana falla í ílátið. Forðast að halda utan um ílátið á meðan nálin og sprautan eru látin falla í það. Loka síðan ílátinu.
  • Að lokum þarf að þvo hendurnar með heitu sápuvatni. Hafa síðan samband við Sorpu um endanlega förgun efnisins.

Hvað skal gera ef stunguóhapp verður?

1. Fjarlægja skal nálina úr húð barnsins.
2. Þrýsta skal hæfilega á sárið til að fá það til að blæða.
3. Þvo svæðið með volgu sápuvatni.
4. Setja sótthreinsandi efni á það og síðan plástur.
5. Fara með barnið strax á heilsugæslustöð eða á bráðavakt spítala til að fá ráðgjöf.


Fyrst birt 17.03.2004

<< Til baka