16.05.19

Tóbakslaus bekkur lokaverkefni 2018-2019. Úrslit

Sjá stærri mynd

Úrslit liggja nú fyrir í samkeppninni Tóbakslaus bekkur skólaárið 2018-2019 sem haldin er meðal tóbakslausra 7., 8. og 9. bekkja í skólum landsins. Tíu bekkir frá jafnmörgum skólum sem sendu inn lokaverkefni unnu til verðlauna. Verðlaunaupphæðin nemur 5.000 krónum fyrir hvern skráðan nemanda í bekknum sem þeim er frjálst að ráðstafa að vild.

Samtals 230 bekkir víðs vegar um landið tóku þátt í keppninni að þessu sinni. Á skólaárinu þurftu bekkirnir að staðfesta fimm sinnum að þeir væru tóbakslausir og voru þá með í útdrætti um vinninga. Vinningarnir voru húfur en auk þess fengu allir þátttakendur spilastokk að gjöf.

Úrslit

Eftirtaldir bekkir hljóta verðlaun:

Giljaskóli 7. HR Akureyri
Grunnskóli Bolungarvíkur 7. bekkur Bolungarvík
Hamraskóli 7. bekkur Reykjavík
Heiðarskóli 7. EN Reykjanesbær
Hlíðaskóli 7. AS Reykjavík
Hrafnagilsskóli
7. bekkur Eyjafjarðarsveit
Kelduskóli
7. bekkur Reykjavík
Langholtsskóli 7. ÁS Reykjavík
Sunnulækjarskóli 7. UBH Árborg
Vogaskóli 7. bekkur Reykjavík

Til að eiga möguleika á fyrstu verðlaunum þurftu nemendur bekkjanna að senda inn áhugavert efni tengt tóbaksvörnum. Nánari útfærsla var ekki skilgreind til að þrengja ekki hugmyndir að verkefnum en beðið var um að þeim væri skilað á rafrænu formi.

Við gerð margra verkefna var leitað út fyrir skólastarfið og þannig stuðlað að samvinnu, miðlun og öflun þekkingar um skaðsemi tóbaksnotkunar.

Fjöldamörg áhugaverð verkefni bárust og má sem dæmi nefna leiknar stuttmyndir, fræðslufyrirlestra, frumsamin lög og veggspjöld.

Embætti landlæknis óskar vinningshöfum innilega til hamingju og þakkar öllum kennurum og nemendum fyrir þeirra framlag og ánægjulegt samstarf.

Viðar Jensson,
verkefnisstjóri

<< Til baka