26.10.18

Ísafjarðarbær gerist Heilsueflandi samfélag

Sjá stærri mynd

Ísafjarðarbær varð formlega aðili að Heilsueflandi samfélagi þann 18. október síðastliðinn þegar Alma D. Möller landlæknir, Margét Halldórsdóttir fyrir hönd Ísafjarðarbæjar og Gylfi Ólafsson forstjóri Heilbrigðisstofnunar Vestfjarða skrifuðu undir samning þess efnis. Heilbrigðisstofnun Vestfjarða er fyrsta heilbrigðisstofnunin sem er formlega aðili að samningi um Heilsueflandi samfélag.

Samhliða undirskriftinni var nýr göngustígur við Fjarðarstræti vígður og tóku nemendur af leikskólanum Tanga og félagar úr íþróttafélaginu Kubba formlega fyrstu skrefin á stígnum.



Meginmarkmið Heilsueflandi samfélags er að styðja samfélög í að skapa umhverfi og aðstæður sem stuðla að heilbrigðum lífsháttum, heilsu og vellíðan allra íbúa. Í slíku samfélagi er heilsa og líðan íbúa í fyrirrúmi í stefnumótun og aðgerðum á öllum sviðum.

Með Ísafjarðarbæ eru 22 sveitarfélög aðilar að Heilsueflandi samfélagi og skuldbinda sig þannig til að efla heilsu og vellíðan íbúa sinna með markvissum hætti. Með innleiðingu Heilsueflandi samfélags vinna sveitarfélög einnig að innleiðingu Heimsmarkmiða Sameinuðu þjóðanna.

Gylfi Ólafsson forstjóri Heilbrigðisstofnunar Vestfjarða , Alma D. Möller landlæknir og Margét Halldórsdóttir fyrir hönd Ísafjarðarbæjar við undirskrift samningsins. 

Nánar um Heilsueflandi samfélag

Nánar um Heimsmarkmið Sameinuðu þjóðanna

Gígja Gunnarsdóttir
verkefnisstjóri Heilsueflandi samfélags

 

<< Til baka