30.05.18

Brautryðjandi í iðkun núvitundar kemur til landsins í dag

Sjá stærri mynd

Jon Kabat-Zinn, prófessor emeritus í læknisfræði við University of Massachusetts, sem lagði fyrstur manna grunn að iðkun núvitundar í læknisfræði og sálfræði í vestrænum heimi, er væntanlegur til Íslands í dag á vegum Embættis landlæknis og Núvitundarsetursins.

Koma hans er liður í samfélagslega verkefninu, Lýðheilsustefnu Íslendinga, sem m.a. felst í að innleiða núvitund og stuðla að vitundarvakningu fyrir bættu geðheilbrigði og vellíðan um allt samfélagið.

Kabat-Zinn þróaði árið 1979 fyrsta núvitundarnámskeið sögunnar, Núvitund gegn streitu (Mindfulness-Based Stress Reduction), sem hefur verið ítarlega rannsakað og reynst árangursríkt fyrir breiðan hóp af fólki. Þekking hans á erindi til allra sem leitast við að gera sitt besta til að takast á við áskoranir daglegs lífs, auka vellíðan og lífsgæði og stuðla að betra samfélagi.

Jon Kabat-Zinn verður með þrjá viðburði í Hörpu dagana 30. maí, 1.-2. júní sem eru ætlaðir öllum sem hafa áhuga á núvitund eða langar einfaldlega til að nýta einstakt tækifæri og kynnast þessum merka frumkvöðli.

Nánari upplýsingar um viðburðina

Harpa - Upplýsingar og miðasala

Dóra Guðrún Guðmundsdóttir 
sviðsstjóri áhrifaþátta heilbrigðis
netfang: dora@landlaeknir.is

<< Til baka