21.02.18

Flensur og aðrar pestir - 7. vika (12.–18. febrúar) 2018

Staðfest inflúensa á veirufræðideild Landspítala
Nokkuð hefur dregið úr aðsendum sýnum til veirufræðideildar vegna greininga á öndunarfærasýkingum í viku 7. Inflúensa B er ennþá mest áberandi, sjá töflu 1 frá veirufræðideild Landspítala.

Inflúensan í heilsugæslu og á bráðamóttökum
Í síðustu viku (7. viku) fækkaði þeim sem greindust með inflúensulík einkenni í heilsugæslunni og bráðamóttökum borið saman við vikuna á undan, sjá mynd 1.

Staðan á meginlandi Evrópu
Inflúensan var áfram í mikilli útbreiðslu á meginlandi Evrópu í 6. viku (5.–11. febrúar), sjá inflúensuvef Sóttvarnastofnunar Evrópusambandsins (ECDC) og Alþjóðaheilbrigðismálastofnunarinnar (WHO). Inflúensa B var enn ríkjandi en bæði inflúensa A(H3) og inflúensa A(H1)pdm09 greindust á meginlandinu. Hlutfall þessara veirustofna er breytilegt milli landa og vöktunarkerfa.

Innlagnir vegna inflúensu á Landspítala
Samkvæmt upplýsingum frá sýkingavarnadeild Landspítala heldur innlögnum áfram að fækka í 7. viku borið saman við vikurnar á undan. Mynd 2 sýnir aldursdreifingu þeirra sem lagðir voru inn á Landspítala með inflúensu frá því í 37. viku 2017. Flestir sem lögðust inn vegna inflúensu voru einstaklingar með undirliggjandi sjúkdóma eða aldraðir.

RSV og aðrar öndunarfæraveirur
Þeim fækkar nokkuð sem greinast með staðfesta Respiratory Syncytial veirusýkingu (RSV). Í 7. viku var veiran staðfest hjá 9 einstaklingum, eins og sjá má á töflu 1 frá veirufræðideild Landspítala. Í síðustu viku var human metapneumóveira staðfest hjá sjö einstaklingum en þeir sem greinast með þessa veiru geta haft svipuð einkenni og RSV veldur hjá börnum.

Samantekt og mat á öndunarfæraveirum síðastliðnar vikur
Vísbendingar eru um að byrjað sé að draga úr árstíðabundnu inflúensunni.

Meltingarfærasýkingar
Samkvæmt tilkynningum frá heilsugæslunni og bráðamóttökum var niðurgangur tíðari en gera má ráð fyrir á þessum árstíma. Vísbendingar eru um að dregið hafi úr fjölda tilfella vegna niðurgangs í viku 7, sjá mynd 3. Aldursdreifing niðurgangstilfella sýnir að aukningin var mest meðal barna á aldrinum 1–4 ára. Líkleg skýring á því var aukin tíðni á rótaveirusýkingu meðal ungra barna, sjá töflu 2 frá veirufræðideild Landspítala.

Sóttvarnalæknir

<< Til baka