08.12.17

Flensur og aðrar pestir - 48. vika 2017

Staðfest inflúensa á veirufræðideild Landspítala
Frá því í september á þessu ári hefur inflúensa A verið staðfest hjá 17 einstaklingum eins og sjá má á vef veirufræðideildar Landspítala. Hluti þeirra sem hafa greinst eru ferðamenn sem smituðust erlendis en einnig hafa einstaklingar smitast hér á landi. Enn hefur enginn greinst með inflúensu af B stofni það sem af er þessum vetri.

Inflúensan í heilsugæslu og á bráðamóttökum
Í viku 48 voru samtals 15 sjúklingar greindir með inflúensu sem leituðu til heilsugæslunnar og á bráðamóttökur, sjá mynd 1.

Staðan á meginlandi Evrópu
Lítið er um inflúensu á meginlandi Evrópu en hægt er að sjá nánari upplýsingar á inflúensuvef Sóttvarnastofnunar Evrópusambandsins (ECDC) og Alþjóðaheilbrigðismálastofnunarinngar (WHO).

Samantekt og mat á inflúensunni síðastliðnar vikur
Inflúensan virðist ekki vera farin að breiðast út í samfélaginu þó stöku tilfelli séu staðfest á veirufræðideild Landspítala.

RSV og aðrar öndunarfæraveirur
Samkvæmt upplýsingum frá veirufræðideild Landspítala hafa samtals 12 einstaklingar greinst með staðfesta Respiratory Syncytial veirusýkingu (RSV) frá því um mánaðarmótin september/október, sjá töflu á vef veirufræðideildar Landspítala. Börn á fyrsta og öðru aldursári greinast hlutfallslega oftast með RSV en veiran hefur einnig verið staðfest hjá öðrum aldurshópum, einkum meðal aldraðra, sem ásamt ungabörnum er þekktur áhættuhópur.

Meltingarfærasýkingar
Fjöldi tilkynninga frá heilsugæslunni og bráðamóttökum um niðurgang er eins og gera má ráð fyrir á þessum árstíma, sjá mynd 2. Í ágúst var óvænt aukning á niðurgangi sem ekki fannst skýring á.

Talsvert hefur greinst af nóró- og sapóveiru frá því í byrjun september, sjá nánar á vef veirufræðideildar Landspítala. Á sama tímabili hafa stöku einstaklingar greinst með rótaveiru.


Sóttvarnalæknir

<< Til baka