04.12.17

Vilja hefja undirbúning og framkvæmd nýrrar landskönnunar á mataræði

Sjá stærri mynd

Embætti landlæknis, Matvælastofnun, Matís og Rannsóknastofa í næringarfræði við Háskóla Íslands og Landspítala undirrituðu í dag viljayfirlýsingu þar sem fram kemur eindreginn vilji þeirra til að hefja undirbúning og framkvæmd nýrrar landskönnunar á mataræði Íslendinga. Um leið er skorað á stjórnvöld að tryggja fjármagn í þennan mikilvæga þátt, bæði til framkvæmdar könnunarinnar sem og til uppbyggingar innviða sem nauðsynlegir eru fyrir framkvæmdina.

Mataræði er einn af veigamestu áhrifaþáttum heilsu ásamt því að vera megin áhættuþáttur fyrir sjúkdómsbyrði hér á landi. Landskannanir á mataræði eru forsenda þess að hægt sé að fylgjast með þróun mataræðis, neyslu næringarefna, aukefna og aðskotaefna meðal landsmanna.

Gagnsemi slíkra kannana er vel þekkt og nýtast niðurstöður við forvarnir gegn langvinnum sjúkdómum, t.d. sykursýki tegund 2, við gerð markmiða og áherslna í heilsueflingu og forvörnum á sviði næringar, við áhættumat og áhættukynningu vegna matvælaöryggis og neytendaverndar, við fræðslu og ráðgjöf til stjórnvalda, fyrirtækja og gerð ráðlegginga um mataræði fyrir almenning.

Sjá viljayfirlýsinguna í heild sinni.

Nánari upplýsingar veita 
Dóra Guðrún Guðmundsdóttir,
sviðsstjóri áhrifaþátta heilbrigðis,
netfang dora(hja)landlaeknir.is og
Hólmfríður Þorgeirsdóttir,
verkefnisstjóri næringar hjá Embætti landlæknis,
netfang holmfridur(hja)landlaeknir.is

Mynd efst vinstra megin frá undirritun samningsins.
Frá vinstri Dóra S. Gunnarsdóttir, forstöðumaður sviðs neytendaverndar hjá Matvælastofnun, Sveinn Margeirsson, forstjóri Matís, Ingibjörg Gunnarsdóttir, forstöðumaður Rannsóknastofu í næringarfræði og Birgir Jakobsson, landlæknir.

Frá vinstri Inga Þórsdóttir, forseti Heilbrigðisvísindasviðs Háskóla Íslands, Hólmfríður Þorgeirsdóttir, verkefnisstjóri næringar hjá Embætti landlæknis, Ingibjörg Gunnarsdóttir, forstöðumaður Rannsóknastofu í næringarfræði, Elva Gísladóttir, verkefnisstjóri næringar hjá Embætti landlæknis, Birgir Jakobsson, landlæknir, Dóra S. Gunnarsdóttir, forstöðumaður sviðs neytendaverndar hjá Matvælastofnun, Dóra Guðrún Guðmundsdóttir, sviðsstjóri áhrifaþátta heilbrigðis hjá Embætti landlæknis og Sveinn Margeirsson, forstjóri Matís.

<< Til baka