17.10.17

Kynnum hetjur til leiks í Tóbakslaus bekkur. Skráning er hafin.

Sjá stærri mynd

Hin árlega samkeppni Tóbakslaus bekkur er að hefjast en hún er nú haldin hér á landi í nítjánda sinn. Í ár fáum við til liðs við okkur nýja kynslóð af hetjum; Reyksuguna, Lyktareyðirinn, Strokarann, Tölvuna og Hugrík, sem ætla að hjálpa okkur að útrýma tóbakinu fyrir fullt og allt með nýjar hugmyndir og sköpunargleðina að vopni.

Skráning er hafin og þarf að skrá bekki í síðasta lagi 17. nóvember 2017 á vefsíðunni Tóbakslaus bekkur.

Öllum sjöundu, áttundu og níundu bekkjum í grunnskólum landsins stendur til boða að taka þátt ef enginn nemandi í viðkomandi bekk notar tóbak. Á keppnistímabilinu verða dregnir út nokkrir heppnir tóbakslausir bekkir og allir í bekknum fá senda gjöf.

Nýtt hetjuþema - Tíu bekkir fá verðlaun fyrir lokaverkefni

Í vor geta samtals tíu bekkir unnið til verðlauna með því að senda inn lokaverkefni. Þeir bekkir sem velja að senda inn lokaverkefni geta unnið fé til að ráðstafa eins og bekkurinn kýs að gera. Upphæðin nemur 5.000 krónum fyrir hvern skráðan nemanda í bekknum.

Í ár lítum við til nýrrar kynslóðar af hetjum til að útrýma tóbakinu fyrir fullt og allt með nýjar hugmyndir og sköpunargleðina að vopni. Reyksugan sogar til sín allan reyk, Lyktareyðirinn getur breytt tóbakslykt í ilm af nýbökuðum smákökum, Strokarinn þurrkar út allt tóbak, Tölvan reiknar út hversu ótrúlega mikið tóbak kostar okkur og Hugríkur skrifar nýja, tóbakslausa framtíð með hugmyndaauðgina að vopni. Markmiðið í ár er að hjálpa þessum hetjum að finna nýjar leiðir til að berjast við tóbakið.

Við hvetjum ykkur til að skrifa sögur þessara persóna, skapa nýjar persónur eða gera hvað annað sem ykkur dettur í hug. Tilgangurinn er einungis að fá nýjar, ferskar og skemmtilegar hugmyndir sem munu móta tóbakslausa framtíð.
Möguleika á að vinna til verðlauna eiga aðeins þeir bekkir sem senda inn lokaverkefni. Verkefnin geta verið með ýmsu móti, t.d. veggspjöld, auglýsingar, stuttmyndir eða fræðsluefni um tóbaksvarnir.

ATH! Stuttmyndir mega ekki vera lengri en tíu mínútur.

Úrslitin verða tilkynnt eftir miðjan maí 2018.

Hægt er að skoða lokaverkefni verðlaunahafa í síðustu samkeppni í frétt um úrslitin 16. maí 2017 

Skráning og allar nánari upplýsingar eru á vefsíðu keppninnar: Tóbakslaus bekkur

Viðar Jensson
Verkefnisstjóri tóbaksvarna

 

<< Til baka