19.09.17

Góður árangur opinbers átaks gegn lifrarbólgu C hér á landi

Í ársbyrjun 2016 hófst hér á landi opinbert átak gegn lifrarbólgu C sem stendur í þrjú ár. Landspítala var falin framkvæmd verkefnisins en aðalsamstarfsaðili er sjúkrahúsið Vogur. Yfirumsjón með verkefninu hefur sóttvarnalæknir í umboði heilbrigðisráðherra.

Um 600 einstaklingar hafa nú hafið lyfjameðferð sem er um 70–80% þeirra sem taldir eru smitaðir hér á landi. Á fyrsta starfsári átaksins hafa um 95% þeirra sem klára meðferðina læknast. Meðferðin stendur í 12 vikur og aukaverkanir eru engar eða vægar sem er mikil breyting frá þeirri meðferð sem áður var boðið upp á.

Einn af hverjum fimm veit ekki af smiti
Lifrarbólga C er oft einkennalaus og talið er að allt að 20% sjúklinga séu ógreindir og viti ekki af smitinu. Á þessum tímamótum er mikilvægt að ná til allra þeirra sem hugsanlega eru smitaðir af lifrarbólgu C og bjóða þeim meðferð. Í þessari viku (18.–22. september) verður gert átak í skimun fyrir lifrarbólgu C og verða send dreifibréf á öll heimili í landinu þar sem allir sem eru í aukinni áhættu að hafa smitast af lifrabólgu C eru hvattir til að fara í greiningarpróf sem má fá á öllum heilsugæslustöðvum. Auk þess verður í vikunni hægt að komast í greiningarpróf á vegum meðferðarátakins án þess að panta tíma. Prófað verður með hraðgreiningarprófum sem þarfnast eingöngu munnstroks eða blóðdropa og fást niðurstöður á 20–40 mínútum. Einnig getur þurft að fá blóðprufu til frekari staðfestingar.

 

Hægt verður að fara á eftirtalda staði í vikunni á vegum meðferðarátaksins:

  • Landspítali
    Göngudeild 10E við Hringbraut - mánudag til föstudags kl. 8–16
    Göngudeild A3 í Fossvogi - mánudag til föstudags kl. 8–16

  • SÁÁ
    Sjúkrahúsið Vogur, Stórhöfða 45 - mánudag til föstudags kl. 8–16

  • Rauði krossinn í Reykjavík
    Frú Ragnheiður, á starfstíma bílsins kl. 18–21

  • Samtökin ´78
    Á opnu húsi að Suðurgötu 3, fimmtudaginn 21. september kl. 17–21

 

Eftirtaldir einstaklingar eru í aukinni áhættu að hafa fengið lifrarbólgu C

  • Þeir sem hafa sprautað sig með fíkniefnum í æð.
  • Þeir sem hafa fengið blóðgjöf, storkuþætti eða ígrædd líffæri fyrir árið 1992.
  • Þeir sem eru smitaðir af HIV.
  • Þeir sem eiga maka sem smitaður er af lifrarbólgu C.
  • Karlmenn sem haft hafa mök við aðra karlmenn.

Mikilvægt er að greina sem flesta á Íslandi sem smitast hafa af lifrarbólgu C og bjóða þeim meðferð því þannig aukast líkur á að hægt verði að uppræta sjúkdóminn á Íslandi.

 

Nánari upplýsingar

Sóttvarnalæknir
Landspítali
Sjúkrahúsið Vogur

 

<< Til baka