21.03.17

Mislingar greinast á Íslandi

Mislingar hafa verið staðfestir í níu mánaða gömlu barni hér á landi. Barnið hafði dvalist með fjölskyldu sinni í Tælandi og kom til landsins 2. mars en veiktist 14. mars sl. með hita, útbrotum og öndunarfæraeinkennum.

Leitað var til bráðamóttöku Barnaspítala Hringsins þann 19. mars með barnið og voru sýni tekin í kjölfarið sem staðfestu mislinga. Barnið er óbólusett vegna síns unga aldurs og þurfti ekki að leggjast inn á Barnaspítalann vegna sinna veikinda.

Mislingar voru skæðir á Íslandi einkum á 19. öld og fram eftir 20. öld. Mjög dró úr nýgengi mislinga eftir að skipulegar bólusetningar hófust gegn sjúkdómnum við 2 ára aldur árið 1976, og var síðasti faraldurinn á Íslandi 1977.

Tilhögun bólusetninga er um þessar mundir með þeim hætti að börn eru bólusett fyrst við 18 mánaða aldur og síðan endurbólusett 12 ára. Síðast greindust mislingar hér á landi í barni árið 2014 og í fullorðnum einstaklingi í fyrra. Þessir einstaklingar, sem smituðust utan landsteinanna, smituðu ekki út frá sér eftir komu til landsins.

Allt að 95% barna hér á landi eru bólusett gegn mislingum ásamt rauðum hundum og hettusótt, sem er eitt hæsta hlutfall bólusettra barna í Evrópu. Því er ekki búist við að mislingar geti náð mikilli útbreiðslu og valdið stórum faröldrum hér á landi. En eins og alltaf má gera ráð fyrir að óbólusettir einstaklingar geti smitast af mislingum hér á landi. Mislingar geta reynst hættulegir einkum óbólusettum ungum börnum og ónæmisbældum einstaklingum.

Þótt hægt sé að bægja mislingum frá með bólusetningum eru mislingar víða að skjóta upp kollinum í Evrópu um þessar mundir hjá óbólusettum einstaklingum, einkum í Rúmeníu. Utan Evrópu og Bandaríkjanna eru mislingar víða landlægir.


Einkenni mislinga

Mislingaveiran er mjög smitandi og berst milli manna með úða frá öndunarfærum (t.d. hósta og hnerra). Veiran getur lifað og valdið smiti í allt að tvær klukkustundir eftir að hún berst út í andrúmsloftið.

Einkenni mislinga byrja að koma fram um 10–12 dögum eftir smit og geta verið mismikil eftir einstaklingum. Þau byrja oftast með flensulíkum einkennum, þ.e. hita, nefrennsli, sviða í augum, hósta, bólgnum eitlum og höfuðverk.

Á þriðja eða fjórða degi veikindanna koma í flestum tilfellum fram útbrot sem ná yfir allan líkamann og standa í 3–4 daga eða þar til sjúkdómurinn fer að réna.

Mislingaveiran getur stundum valdið alvarlegum sjúkdómi og leitt til eyrna- eða lungnabólgu, kviðverkja, uppkasta, niðurgangs og heilabólgu. Mislingar eru mest smitandi dagana áður en útbrotin koma fram en eftir það dregur úr smitlíkum næstu fjóra dagana. Sjá nánar um sjúkdóminn og útbreiðslu hans: Mislingar

Landspítali og heilsugæsla höfuðborgasvæðisins munu hafa samband við foreldra óbólusettra barna sem hugsanlega gætu hafa smitast af viðkomandi barni og bjóða þeim nauðsynlega þjónustu og ráðleggingar. Barnið er ekki í dagvistun.

Sóttvarnalæknir

<< Til baka