09.03.17

Flensur og aðrar pestir – 9. vika 2017

Staðfest inflúensa á veirufræðideild Landspítala
Frá því í lok nóvember 2016 hefur inflúensa A(H3) verið staðfest hjá 392 einstaklingum og inflúensa B hjá 6 einstaklingum, sjá töflu 1.

Inflúensan í heilsugæslu og á bráðamóttökum
Dregið hefur umtalsvert úr fjölda þeirra sem greinst hafa með inflúensulík einkenni í heilsugæslunni eins og sjá má á mynd 1. Hægt er að skoða aldursdreifingu þeirra í töflu 2 frá 40. viku 2016 – 9. viku 2017 en þar kemur fram að tíðni inflúensulíkra einkenna er svipuð í öllum aldurshópum en þó lægst í börnum undir eins árs en hæst í aldurshópnum 15 – 19 ára.

Innlagnir á Landspítala
Frá því í byrjun september 2016 hafa alls 173 einstaklingar legið á Landspítala vegna inflúensu, þar af greindust 19 í síðustu viku (9. viku 2017) sem er nokkur fækkun borið saman við vikuna á undan. Flestir eiga það sameiginlegt að vera 67 ára og eldri.

Staðan á meginlandi Evrópu
Farið er að draga úr inflúensufaraldrinum á meginlandi Evrópu, sjá nánar á inflúensuvef Sóttvarnarstofnunar ESB (ECDC). Ráðandi stofn hefur verið inflúensa A(H3N2), sem leggst þyngst á eldri borgara, og er það í samræmi við aldursdreifinguna hér á landi. Inflúensa af B stofni greinist nú víða sem ekki er óalgengt þegar líða tekur á árstíðabundna inflúensufaraldurinn.

Samantekt og mat á inflúensunni síðastliðnar vikur
Byrjað er að draga úr inflúensunni og má gera ráð fyrir að tilfellum fækki á næstu vikum. Inflúensa A(H3N2) er sá stofn sem aðallega hefur verið í dreifingu, en ekki er útilokað að inflúensa B eigi eftir að koma í kjölfarið á næstu vikum.

RSV og aðrar öndunarfæraveirur
Samkvæmt upplýsingum frá veirufræðideild Landspítala fer einstaklingum sem greinast með staðfesta Respiratory Syncytial veirusýkingu (RSV) fækkandi en hún hefur greinst hjá alls 163 einstaklingum frá því í byrjun október, sjá töflu 1. Börn á fyrsta og öðru aldursári greinast hlutfallslega oftast með RSV en veiran hefur einnig verið staðfest hjá öðrum aldurshópum, einkum meðal aldraðra, sem ásamt ungabörnum er þekktur áhættuhópur.

Á þessum vetri hefur alls 41 einstaklingur greinst með metapneumoveiru, en sá hópur er á öllum aldri frá tveggja mánaða til 85 ára.

Meltingarfærasýkingar
Fjöldi tilkynninga frá heilsugæslunni og bráðamóttökum um niðurgang er eins og gera má ráð fyrir á þessum árstíma, sjá mynd 2.

Samkvæmt upplýsingum frá veirufræðideild Landspítala var lítið um jákvæð saursýni í 9. viku ársins. Nóróveira hefur oftast greinst í saursýnum í vetur, sjá töflu 4.

Sóttvarnalæknir

<< Til baka