01.03.17

Flensur og aðrar pestir – 8. vika 2017

Staðfest inflúensa á veirufræðideild Landspítala
Frá því í lok nóvember 2016 hefur inflúensa A(H3) verið staðfest hjá 361 einstaklingi en í viku 8 greindust að auki tveir einstaklingar með inflúensu B, sjá töflu 1. Í síðustu viku greindust heldur færri með staðfesta inflúensu samanborið við vikurnar á undan. Inflúensan hefur nú verið staðfest í öllum landshlutum. Enginn hefur greinst með inflúensu A(H1) en fjórir einstaklingar hafa greinst með inflúensu B.

Inflúensan í heilsugæslu og á bráðamóttökum
Tekið er að draga úr fjölda þeirra sem greinast með inflúensulík einkenni í heilsugæslunni eins og sjá má á mynd 1. Hægt er að skoða aldursdreifingu þeirra í töflu 2 frá 40. viku 2016 – 8. viku 2017 en þar kemur fram að tíðni inflúensulíkra einkenna er svipuð í öllum aldurshópum en þó lægst í börnum undir eins árs en hæst í aldurshópnum 15 – 19 ára.

Innlagnir á Landspítala
Frá því í byrjun september 2016 hafa alls 155 einstaklingar legið á Landspítala vegna inflúensu, þar af greindust 24 í síðustu viku (8. viku 2017) sem er nokkur aukning borið saman við vikurnar á undan. Flestir eiga það sameiginlegt að vera 67 ára og eldri. Þótt farið sé að draga úr inflúensunni í samfélaginu veldur hún enn alvarlegum einkennum sem leiða til sjúkrahúsinnlagna.

Staðan á meginlandi Evrópu
Farið er að draga úr inflúensufaraldrinum á meginlandi Evrópu, sjá nánar á inflúensuvef Sóttvarnarstofnunar ESB (ECDC). Ráðandi stofn hefur verið inflúensa A(H3N2), sem leggst þyngst á eldri borgara, og er það í samræmi við aldursdreifinguna hér á landi. Inflúensa af B stofni greinist nú víða sem ekki er óalgengt þegar líða tekur á árstíðabundna inflúensufaraldurinn.

Samantekt og mat á inflúensunni síðastliðnar vikur
Byrjað er að draga úr inflúensunni og má gera ráð fyrir að tilfellum fækki á næstu vikum. Inflúensa A(H3N2) er sá stofn sem aðallega hefur verið í dreifingu, en ekki er útilokað að inflúensa B eigi eftir að koma í kjölfarið á næstu vikum.

RSV og aðrar öndunarfæraveirur
Samkvæmt upplýsingum frá veirufræðideild Landspítala fer einstaklingum sem greinast með staðfesta Respiratory Syncytial veirusýkingu (RSV) fækkandi en hún hefur greinst hjá alls 155 einstaklingum frá því í byrjun október, sjá töflu 1. Þar af greindust 12 einstaklingar í síðustu viku. Það má því gera ráð fyrir að RSV sé enn í dreifingu í samfélaginu. Börn á fyrsta og öðru aldursári greinast hlutfallslega oftast með RSV en veiran hefur einnig verið staðfest hjá öðrum aldurshópum, einkum meðal aldraðra, sem ásamt ungabörnum er þekktur áhættuhópur.

Á þessum vetri hafa alls 37 einstaklingar greinst með metapneumoveiru, en sá hópur er á öllum aldri frá tveggja mánaða til 85 ára.

Nokkrir einstaklingar greindust með rhinoveiru, sjá töflu 3.

Meltingarfærasýkingar
Fjöldi tilkynninga frá heilsugæslunni og bráðamóttökum um niðurgang er eins og gera má ráð fyrir á þessum árstíma, sjá mynd 2.

Samkvæmt upplýsingum frá veirufræðideild Landspítala var lítið um jákvæð saursýni í 8. viku ársins, einn greindist með caliciveiru, þrír með rótaveiru og einn með adenóveiru, sjá töflu 4.

Sóttvarnalæknir

<< Til baka