08.09.16

Vinir Zippýs – Námskeið fyrir leik- og grunnskólakennara

Sjá stærri mynd

Námskeið fyrir leik- og grunnskólakennara í kennslu námsefnisins Vinir Zippýs verður haldið þann 26. september nk. kl. 12:30 – 17:30 í þjónustumiðstöð Vesturbæjar, Miðborgar og Hlíða á Laugavegi 77 í Reykjavík. Námskeiðið og námskeiðsgögn eru kennurum að kostnaðarlausu.

Vinir Zippýs er ætlað fyrir börn á aldrinum 5–7 ára og miðar að því að auka félagsfærni ungra barna, efla getu þeirra til að skilja og tjá eigin tilfinningar, finna heppilegar lausnir á vanda og takast á við mótlæti. Námsefnið er byggt upp af sex námsþáttum sem hver inniheldur fjórar kennslustundir.

Kennslustundunum er lýst með nákvæmum hætti í vönduðum kennslugögnum sem fylgja námskeiði.

Rannsóknir benda til þess að kennsla í Vinum Zippýs hafi jákvæð áhrif á hæfni nemenda til að takast á við vandamál og erfiðleika auk jákvæðra áhrifa á tilfinningalæsi, samvinnu, sjálfstæði og upplifun af félagslegum stuðningi.

Könnun á vegum Embættis landlæknis meðal íslenskra grunnskóla árið 2012 sýndi að af þeim sem höfðu nýtt sér námsefnið greindu langflestir frá ánægju með það, en 84% töldu frekar eða mjög mikla ánægju ríkja með námsefnið meðal kennara og 79% töldu frekar eða mjög mikila ánægju ríkja meðal nemenda. Um helmingur (48%) taldi námsefnið hafa auðveldað skólastarfið og nefndu flestir að samskipti milli nemenda væru betri auk þess sem börnin ættu auðveldara með að tjá sig.

Skráningarfrestur er til og með 20. september 2016. Athugið að fjöldi þátttakenda er takmarkaður.

Skráning fer fram hér: Skráning á námskeið

Frekari upplýsingar veitir Sigrún Daníelsdóttir, verkefnisstjóri geðræktar
sigrun@landlaeknir.is

<< Til baka