17.11.15

Bólusetning gegn pneumókokkum dregur úr lungnabólgu og eyrnabólgu hjá börnum

Ný grein verður birt á næstunni í hinu virta vísindatímariti The Pediatric Infectious Disease Journal (Pediatr Infect Dis J 2015;34:1385–1390) um áhrif bólusetningar á tíðni lungnabólgu og eyrnabólgu hjá börnum hér á landi.

Áður hefur sóttvarnalæknir greint frá því að bólusetningin hefur nánast útrýmt alvarlegum pneumókokkasýkingum hjá börnum (blóðsýkingum og heilahimnubólgu) og fækkað alvarlegum sýkingum hjá fullorðnum verulega.

Almenn bólusetning með bóluefni gegn sýkingum af völdum pneumókokkum hófst hér á landi á árinu 2011 með bóluefninu Synflorix sem framleitt er af lyfjaframleiðandanum GlaxoSmithKline (GSK). Hvert barn fær þrjár sprautur við 3, 5 og 12 mánaða aldur og hefur þátttakan verið um og yfir 90%.

Vísindamenn á Landspítala og við Háskóla Íslands könnuðu áhrif bólusetningarinnar hjá börnum sem leituðu til Barnaspítala Hringsins og komust að því að eftir að almenn bólusetning hófst hér á landi lækkaði tíðni eyrnabólgu hjá börnum um 24% og lungnabólgu um 23%.

Þetta eru mjög ánægjuleg tíðindi fyrir íslensk börn og eru niðurstöðurnar samhljóða niðurstöðum annarra landa um áhrif bólusetninga gegn pneumókokkum. Fleiri niðurstaðna er að vænta frá þessum rannsóknarhópi, m.a. um hvort bólusetningin dragi úr notkun sýklalyfja og fækki sýklalyfjaónæmum bakteríum.

Sóttvarnalæknir

<< Til baka