07.10.14

Tóbakslaus bekkur – Níunda bekk boðin þátttaka í fyrsta sinn

Sjá stærri mynd

Hin árlega samkeppni Tóbakslaus bekkur er að hefjast og er hún nú haldin hér á landi í sextánda sinn. Í ár geta allir sjöundu, áttundu og níundu bekkir í grunnskólum landsins tekið þátt í samkeppninni ef enginn nemandi í viðkomandi bekk notar tóbak. Er þetta í fyrsta skipti sem níunda bekk gefst kostur á að taka þátt í keppninni.

Skráning er hafin og þarf að skrá bekki í síðasta lagi 14. nóvember 2014. Þátttaka í samkeppninni hefur alltaf verið mjög góð og er vonast til þess að svo verði einnig í ár. Allir nemendur fá litla gjöf eftir áramót sem umbun fyrir þátttöku. Í lok janúar og mars verða dregnir út nokkrir bekkir sem vinna húfur frá 66° Norður.

Verðlaun
Alls tíu bekkir sem senda inn lokaverkefni vinna til verðlauna.

Bekkir sem velja að senda inn lokaverkefni geta unnið fé til að ráðstafa eins og bekkurinn sjálfur kýs að gera. Upphæðin nemur 5.000 krónum fyrir hvern skráðan nemanda í bekknum.

Möguleika á að vinna til verðlauna eiga aðeins þeir bekkir sem senda inn lokaverkefni. Verkefnin geta verið með ýmsu móti, t.d. veggspjöld, auglýsingar, stuttmyndir eða fræðsluefni um tóbaksvarnir.

ATH! Myndbönd mega ekki vera lengri en tíu mínútur.

Hægt er að skoða lokaverkefni verðlaunahafa í frétt um úrslitin 16. maí 2014

Skráning og allar nánari upplýsingar eru á vefsíðu keppninnar: Tóbakslaus bekkur

Eftir miðjan maí 2015 verða úrslitin tilkynnt.

Viðar Jensson
verkefnisstjóri tóbaksvarna

<< Til baka