13.08.14

Málstofa um skimunartækin PEDS/Brigance Screens

Sjá stærri mynd

Fimmtudaginn 4. september nk. kl. 13:00–16:30 verður málstofa á Grand Hóteli í Reykjavík um notkun skimunartækjanna PEDS og Brigance Screens í ung- og smábarnavernd hér á landi.

Málstofan er á vegum Embættis landlæknis, þróunarsviðs Heilsugæslu höfuðborgarsvæðisins og Námsmats-
stofnunar. Markmið hennar er að skoða reynslu af notkun þessara vinnutækja til að meta almennan þroska barna í ung- og smábarnavernd í 18 mánaða skoðun og síðan í skoðunum barna 2½ og 4 ára.

PEDS (Parents' Evaluation of Developmental Status) er spurningalisti með 10 spurningum sem foreldrar svara um þroska og hegðun barns síns.

Brigance Screens skimunartækið nær til margra þroskaþátta, þar með talið fín- og grófhreyfinga, almennrar þekkingar, máls, skólafærni og beitingar skriffæris og er það lagt fyrir barnið af hjúkrunarfræðingi. Þau viðmið sem hafa verið notuð hingað til eru byggð á rannsóknum á bandarískum börnum en nú vinnur Námsmatsstofnun að staðfærslu þeirra fyrir íslenskar aðstæður. Verða niðurstöður þeirrar vinnu kynntar á málstofunni.

Frances Page Glascoe Sérstakur gestur málstofunnar er dr. Frances Page Glascoe, prófessor við Vanderbilt háskólann í Nashville í Tennessee í Bandaríkjunum. Dr. Glascoe hefur yfir tveggja áratuga reynslu af kennslu og störfum með barnalæknum. Rannsóknir hennar beinast fyrst og fremst að áreiðanleika þroska- og hegðunarskimunarmælinga og hún hefur samið yfir 100 greinar og kafla í fræðitímarit og bækur um efnið.

Dr. Glascoe er höfundur eða meðhöfundur nokkurra skimunarprófa, þar á meðal Parents’ Evaluation of Developmental Status (PEDS) og PEDS: Developmental Milestones, sem eru mælitæki til að skima, fylgjast með og auðvelda ákvarðanir um meðferð barna að 8 ára aldri sem eiga við þroska- eða hegðunarvanda að stríða (www.pedstest.com) auk ritanna  Brigance Infant and Toddler Screens og Safety Word Inventory and Literacy Screener (SWILS).

Dr. Glascoe kemur hingað til lands til að aðstoða þá sem standa að málstofunni við staðfærslu PEDS og Brigance Screens hér á landi. Mun hún halda erindi um notkun þessara skimunartækja og mikilvægi þeirra í daglegu starfi með börnum og fjölskyldum þeirra.

Málstofan er opin öllu áhugafólki um góða heilsugæslu og ung- og smábarnavernd hér á landi. Þátttaka er ókeypis.

Sjá nánar:


Geir Gunnlaugsson

landlæknir

 

<< Til baka