NCSP

Norræn flokkun aðferða og aðgerða í skurðlækningum (NCSP, NOMESCO Classification of Surgical Procedures) er samnorrænt flokkunarkerfi sem byggir á hefðum í skurðlækningum á Norðurlöndunum. Kerfið er gefið út af Norræna heilbrigðistölfræðiráðinu, NOMESCO.

Flokkunarkerfið samanstendur af 15 aðalköflum skurðaðgerða, sem raðað er eftir starfrænni líffærafræði líkamans, fjórum aukaköflum sem innihalda aðferðir til rannsókna og meðferðar í tengslum við skurðaðgerðir, og loks einum kafla með viðbótarlýsingum, sem eiga við hina kaflana. NCSP-kóðarnir samanstanda af þremur bókstöfum og tveimur tölustöfum.

NCSP flokkunarkerfið hefur verið í notkun á Íslandi síðan 1997 og inniheldur nokkra íslenska viðaukakóða svokallaða V-kóða sem m.a. eru notaðir til að lýsa hjartaþræðingum o.fl. 

NCSP flokkunarkerfið, sem verið hefur í notkun á Íslandi, er þýðing enskrar útgáfu kerfisins, en hún er sameiginleg grunnútgáfa flokkunarkerfisins fyrir öll Norðurlöndin. Nálgast má flokkunarkerfið á vefnum skafl.is. Enska útgáfu NCSP er að finna í pdf-skjali á vef NOMESCO. Enska útgáfa NCSP-flokkunarkerfisins var síðast uppfærð árið 2014. 

NCSP flokkunarkerfið hefur undanfarin ár þróast í áttina að sérútbúnum landskóðum hvers lands fyrir sig, þar á meðal á Íslandi. Einnig er flokkunarkerfið ýmsum takmörkunum háð og þannig upp byggt að það er orðið erfitt að koma við nýjum kóðum.

Embætti landlæknis gefur út sérstaka landsútgáfu af NCSP sem kallast NCSP-IS og gefur sú skrá möguleika á ítarlegri skráningu í dag.

NordDRG gefur síðan út sérstaka vörpunarskrá NCSP+ þar sem landskóðar Norðurlandanna varpast í NCSP ( https://www.nordcase.org/eng/forum/).


© Nordic Medico-Statistical Committee (NOMESCO) á höfundarrétt á NCSP útgáfunni. Örn Bjarnason á höfundarrétt á íslenskum þýðingu NCSP.

Síðast uppfært 19.04.2021