Heimsfaraldur inflúensu – Smitleiðir, einkenni og meðferð

Einkenni sýkingar
Algengustu einkennin eru skyndilegur hiti, hósti, hálssærindi, slappleiki, beinverkir og höfuðverkur. Einkennum frá meltingarfærum (ógleði, uppköst og/eða niðurgangur) hefur verið lýst.


Smitleiðir og smittími
Veiran smitast manna á milli með hósta og hnerra, smitlíkur eru mestar ef fjarlægð frá sjúklingi er minna en einn meter. Smit berst einnig í slímhúðir í munni, nefi og augum, með höndum sem hafa mengast frá höndum inflúensusjúklinga eða menguðu yfirborði í umhverfi þeirra. Inflúensusjúklingar eru mest smitandi í upphafi veikinda, en smithætta er að mestu leyti horfin sjö dögum eftir upphaf veikinda.


Greining á rannsóknarstofu
Hægt er að taka sýni frá öndunarfærum til greiningar.  Sjúkdómsgreiningin byggir þá á mati læknis.


Tími frá smiti þar til fyrstu einkenni koma í ljós
Meðgöngutími veirunnar, þ.e. tími frá smiti til fyrstu einkenna er oftast 2 - 3 dagar en getur verið allt frá 1 – 7 daga.


Almenn meðferð
Ráðlegt er að hvíla sig og drekka ríkulega. Notkun hitalækkandi lyfja (t.d. paracetamols) við háum hita er ráðlögð, en asperín skal ekki gefa börnum undir 16 ára aldri vegna hættu á Reyes-heilkenni sem leggst á miðtaugakerfi og lifur.

Veirulyf, einkum lyfin zanamivir (Relenza®) og oseltamivir (Tamiflu®), draga úr sjúkdómseinkennum og stytta veikindatímann, einnig í heimsfaraldri inflúensu. 

Lyfin eru notuð á tvennan hátt:

  • Til að meðhöndla veika einstaklinga. 
  • Til að koma í veg fyrir smit hjá þeim sem annast sjúklinga með inflúensu.



 

Síðast uppfært 29.10.2012




Search



Change Fontsize