22.03.19

Flensur og aðrar pestir - 11. vika 2019

Staðfest inflúensa á veirufræðideild Landspítala
Inflúensa A var staðfest hjá 30 einstaklingum, sem er fækkun miðað við vikuna á undan, sjá vef veirufræðideildar Landspítala. Þar af voru 15 einstaklingar með inflúensu A(H1N1)pdm09 og 15 með inflúensu A(H3N2). Alls greindust 19 einstaklingar með staðfesta inflúensu á Landspítala, sem er fækkun borið saman við undanfarandi viku, þar af voru sex inniliggjandi. Aðeins tveir hafa greinst með inflúensu af B-stofni það sem af er þessum vetri.

Inflúensan í heilsugæslu og á bráðamóttökum
Alls 82 einstaklingar leituðu til heilsugæslunnar og á bráðamóttökur með einkenni inflúensu samkvæmt klínísku mati læknis, sem er fækkun miðað við vikuna á undan, sjá mynd 1.

Staðan á meginlandi Evrópu
Inflúensa er nú útbreidd á meginlandi Evrópu en hægt er að sjá nánari upplýsingar á sameiginlegum inflúensuvef Sóttvarnastofnunar Evrópusambandsins (ECDC) og Evrópudeildar Alþjóðaheilbrigðismálastofnunarinnar (WHO). Yfirlit fyrir 11. viku ársins 2019 hefur ekki verið birt þegar þetta er ritað.

Samantekt og mat á inflúensunni síðastliðnar vikur
Þeim sem voru með inflúensu að klínísku mati læknis, fækkaði í síðustu viku, sjá mynd 1, samtímis dró bæði úr fjölda þeirra sem greindust með staðfesta inflúensu og fjölda þeirra sem voru inniliggjandi á Landspítala með inflúensu. Inflúensan virðist því vera á undanhaldi þennan veturinn.

RSV og aðrar öndunarfæraveirur
Enn er töluvert um staðfesta Respiratory Syncytial veirusýkingu (RSV), en í síðustu viku var veiran staðfest hjá átta einstaklingum, sjá töflu á vef veirufræðideildar Landspítala. Börn á fyrsta og öðru aldursári greinast hlutfallslega oftar með RSV en veiran hefur einnig verið staðfest hjá öðrum aldurshópum, einkum meðal aldraðra, sem ásamt ungbörnum er þekktur áhættuhópur.

Meltingarfærasýkingar
Í febrúar og það sem af er mars hefur fjöldi tilkynninga frá heilsugæslunni og bráðamóttökum um niðurgang verið lægri en á sambærilegum árstíma síðustu ára, sjá mynd 2.

Í síðustu viku (10. viku) var róta-, sapó- og adenóveira staðfest hjá alls þremur einstaklingum, sjá nánar á vef veirufræðideildar Landspítala.

Sóttvarnalæknir