13.03.19

Flensur og aðrar pestir 10. vika 2019

Staðfest inflúensa á veirufræðideild Landspítala
Inflúensa A var staðfest hjá 43 einstaklingum, sem er aukning miðað við undanfarandi vikur, sjá vef veirufræðideildar Landspítala. Þar af greindust 19 einstaklingar með inflúensu A(H1N1)pdm09, 22 voru með inflúensu A(H3N2), en tveir voru með inflúensu A stofn sem ekki var hægt að undirgreina. Alls greindist 31 einstaklingur með staðfesta inflúensu á Landspítala, sem er aukning borið saman við undanfarandi viku, þar af voru 10 inniliggjandi. Þessi aukning skýrist að miklu leyti af sýkingahrinu á einni legudeild Landspítala, því á síðastliðnum tveimur vikum hafa alls 14 sjúklingar og starfsmenn greinst með staðfesta inflúensu A(H3), en hrinan er nú gengin yfir.

Mikil aukning var á fjölda öndunarfærasýna, sem barst í greiningu á veirufræðideild vegna mislinga í samfélaginu en í sumum tilfellum reyndust veikindin vera vegna inflúensu, þessi aukning á fjölda sýna leiddi því til fleiri staðfestra inflúensugreininga. Aðeins tveir hafa greinst með inflúensu af B-stofni það sem af er þessum vetri.

Inflúensan í heilsugæslu og á bráðamóttökum
Alls 128 einstaklingar leituðu til heilsugæslunnar og á bráðamóttökur með einkenni inflúensu samkvæmt klínísku mati læknis, sem er fækkun miðað við vikuna á undan, sjá mynd 1.


Staðan á meginlandi Evrópu
Inflúensa er nú útbreidd á meginlandi Evrópu en hægt er að sjá nánari upplýsingar á sameiginlegum inflúensuvef Sóttvarnastofnunar Evrópusambandsins (ECDC) og Evrópudeildar Alþjóðaheilbrigðismálastofnunarinnar (WHO). Yfirlit fyrir 10. viku ársins 2019 hefur ekki verið birt þegar þetta er ritað.


Samantekt og mat á inflúensunni síðastliðnar vikur
Þeim fækkar sem eru með inflúensu að klínísku mati læknis, sjá mynd 1. En mikil aukning var á staðfestri inflúensu og fleiri greindust með staðfesta inflúensu á Landspítala vegna sýkingahrinu á einni legudeild á spítalanum. Aukinn fjöldi öndunarfærasýna, sem tekin voru vegna hugsanlegra mislinga, en reyndist vera inflúensa, leiddi til þess að fleiri greindust með staðfesta inflúensu. Þessi aukning á staðfestum greiningum endurspeglar því ekki endilega inflúensuna í samfélaginu ef bera á saman við fyrri vikur. Inflúensan gæti þrátt fyrir allt verið á undanhaldi þennan vetur, sbr. fækkun á klínískum greiningum á heilsugæslustöðvum og bráðamóttökum.


RSV og aðrar öndunarfæraveirur
Enn er töluvert um staðfesta Respiratory Syncytial veirusýkingu (RSV), en í síðustu viku var veiran staðfest hjá átta einstaklingum, sjá töflu á vef veirufræðideildar Landspítala. Börn á fyrsta og öðru aldursári greinast hlutfallslega oftast með RSV en veiran hefur einnig verið staðfest hjá öðrum aldurshópum, einkum meðal aldraðra, sem ásamt ungbörnum er þekktur áhættuhópur.


Meltingarfærasýkingar
Í febrúar og það sem af er mars hefur fjöldi tilkynninga frá heilsugæslunni og bráðamóttökum um niðurgang verið lægri en á sambærilegum árstíma síðustu ára, sjá mynd 2.

Í síðustu viku (10. viku) var nóró-, sapó- og adenóveira staðfest hjá alls fjórum einstaklingum. Undanfarandi vikur hafa stöku einstaklingar greinst með fyrrgreindar veirur. Síðastliðnar sex vikur hefur enginn greinst með staðfesta rótaveiru, sjá nánar á vef veirufræðideildar Landspítala.

Sóttvarnalæknir