Hvað felst í Skráargatinu?

Sjá stærri mynd

Skráargatið er opinbert samnorrænt merki sem auðveldar neytendum að velja hollar matvörur úr hillum verslana.

Matvörur sem bera Skráargatið verða að uppfylla ákveðin skilyrði varðandi samsetningu  næringarefna. Skráargatið auðveldar því neytendum valið á hollari matvörum og þar með að fara eftir opinberum ráðleggingum um mataræði og næringarefni.

Skilyrði varðandi samsetningu næringarefna:

  • Minni og hollari fita
  • Minni sykur
  • Minna salt
  • Meira af trefjum og heilkorni

Skráargatið - Einfalt að velja hollara

Veldu vörur merktar Skráargatinu. Þú getur fundið Skráargatið á:

  • Ávöxtum og berjum
  • Brauði og kornvörum
  • Fiski, skelfiski og vörum úr fiski 
  • Grænmeti og kartöflum
  • Kjöti og kjötvörum
  • Matarolíu og viðbiti
  • Mjólk og mjólkurvörum
  • Tilbúnum réttum
  • Vörum úr jurtaríkinu sem valkostur við dýraafurðir

Mikilvægt að borða fjölbreytt

Skráargatið auðveldar þér að velja hollari matvöru, en það er líka mikilvægt að hafa fjölbreytnina í fyrirrúmi og gæta þess að fá fæðu úr öllum fæðuflokkum yfir daginn.

Grænt eða svart Skráargat?

Skráargatið er ýmist grænt að lit eða svart, á þessu tvennu er þó enginn munur. Merkið er skrásett vörumerki, sem þýðir að það eru settar kröfur um útlit merkisins.

Skráargatið - óháð lit - mun alltaf þýða hollara val, innan hvers vöruflokks.

Skráargatið er fyrir alla

Skráargatsmerktar vörur henta nær öllum, bæði börnum og fullorðnum. Merkið er fyrir þá sem vilja borða hollan mat.

 

 

Síðast uppfært 15.10.2014