Fara beint í efnið

Heilsueflandi grunnskóla er ætlað að styðja skóla í að vinna markvisst að heilsueflingu í starfi sínu. Í því felst að skapa skólaumhverfi sem stuðlar að andlegri, líkamlegri og félagslegri heilsu og vellíðan nemenda og starfsfólks í samvinnu við heimili og nærsamfélag. Skólar koma sér upp heildrænni og vel skipulagðri heilsustefnu þar sem horft er á allt skólasamfélagið í heild.

Umsókn fyrir heilsueflandi grunnskóla

Þátttaka veitir

  • Aðgang að heilsueflandi.is sem er rafrænt kerfi þar sem hver grunnskóli heldur utan um heilsueflingarstarf skólans

  • Leiðbeiningar um ferlið og notkun heilsueflandi.is

  • Aðgang að fyrirlestrum og fræðsluefni

  • Spjald til að hengja upp í skólanum

  • Stuðning gegnum síma og tölvupóst

  • Að sjá og sýna hvað þau eru að gera góða hluti!

  • Heilsueflandi grunnskóli á Facebook


Í hverju felst starfið?

Heilsueflandi grunnskóli er ekki verkefni með upphaf og enda heldur nálgun sem nýtist í starfinu til framtíðar. Hver grunnskóli vinnur á þeim hraða sem þeim hentar og reiknað er með að skólinn taki sér allt að ár í undirbúning. 

Undirbúningur

Undirbúningsvinnan felst í því að

  • mynda stýrihóp

  • skoða stöðu grunnskólans

  • gera grunn að heilsustefnu

  • fylla út í gátlista á lokuðu vefsvæði sem þátttökuskólar hafa aðgang að. Þar getur hver og einn skóli metið eigin stöðu og í framhaldinu haldið utan um markvisst heilsueflingarstarf. 

Kostnaður

Þátttaka er grunnskólum að kostnaðarlausu og ekki þörf á undirbúningsvinnu áður en sótt er um.

Umsóknarferli

Að sækja um felur í sér að grunnkólinn hefur einsett sér að vinna markvisst að heilsueflingu í sínum skóla og að skólastjórnendur staðfesti það með undirskrift umsóknar. Eftir að umsókn er móttekin fær grunnskólinn sendan aðgang að heilsueflandi.is auk ýmissa upplýsinga til þess að hjálpa þeim að hefja vinnuna. 

Ekki hika við að hafa samband á netfangið hgs@landlaeknir.is til þess að fá frekari upplýsingar.

Nánar um Heilsueflandi grunnskóla

Heilsueflandi grunnskóli er afurð þróunarstarfs sem var unnið í samstarfi við fjölmarga hagsmunaaðila. Við mótun Heilsueflandi grunnskóla var stuðst við efni frá Samtökum heilsueflandi skóla í Evrópu (Schools for Health in Europe, SHE). Egilsstaðaskóli var forystuskóli í þeirri vinnu.

Mennta- og menningarmálaráðuneytið og velferðarráðuneytið hafa stutt við mótun Heilsueflandi grunnskóla en einnig eiga Samband íslenskra sveitarfélaga, Heimili og skóli, skólaheilsugæslan, háskólasamfélagið, Menntamálastofnun og skóla- og frístundasvið Reykjavíkur fulltrúa í ráðgefandi faghópi Heilsueflandi grunnskóla.

Þjónustuaðili

Embætti land­læknis