Notkunarleiðbeiningar fyrir romiplostum (Nplate®) -LSH

Notkunarleiðbeiningar fyrir romiplostum (Nplate®)

Romiplostim er prótein sem líkir eftir verkun vaxtaþáttar sem örvar framleiðslu á blóðflögum í mergnum. Lyfið ýtir undir þroska og framleiðslu blóðflaga og eykur þannig fjölda blóðflaga sem seytt er úr mergnum út í blóðið. Sjálfvakin blóðflögufæð (immune thrombocytopenic purpura, ITP) er sjálfsofnæmisjúkdómur sem einkennist af aukinni eyðingu á blóðflögum og stundum minnkaðri framleiðslu. Sjúkdómurinn getur valdið mikilli lækkun á blóðflögum í blóði og blæðingum. Talað er um langvinnt ITP ef sjúkdómurinn varir lengur en í 12 mánuði. Romiplostim hefur markaðsleyfi í Evrópu sem meðferð við langvinnu ITP eftir miltistöku þar sem sjúklingur svarar ekki annarri meðferð og einnig hjá sjúklingum sem svara ekki annarri meðferð þar sem miltistaka kemur ekki til greina. Lyfið er notað við ofangreindum ábendingum í Danmörku, Finnlandi, Noregi og Svíþjóð. Gerð hefur verið kostnaðarábatagreining og samþykktar leiðbeiningar á vegum NICE í apríl 2011 þar sem meðferð með romiplostim er ráðlögð við langvinnu ITP þar sem hefðbundin meðferð gagnast ekki eða sjúklingur er með alvarlegan sjúkdóm með mikilli blæðingarhættu og þarf á endurteknum meðferðum að halda með stuttu millibili. (http://guidance.nice.org.uk/TA221/Guidance/pdf/English)
 
Útgefið 20. febrúar 2014 
 

Vefsíða yfirfarin 19.03.2014

<< Til baka