20.03.17

Vaxandi útbreiðsla gulusóttar (yellow fever) í Brasilíu

Alþjóðaheilbrigðismálastofnunin (WHO) hefur vakið athygli á vaxandi útbreiðslu gulusóttar í Brasilíu. Gulusótt (yellow fever) er veirusýking sem berst með moskítóflugum og getur valdið alvarlegum veikindum eins og lifrarbilun, nýrnabilun, innri og ytri blæðingum og skertri heilastarfsemi.

Engin meðferð er til við sjúkdómnum en hægt er að koma í vega fyrir sýkingu með því að forðast bit moskítóflugna með því að nota moskítófælandi áburð (athuga að efni sem innihalda DEET má ekki nota fyrir börn yngri en þriggja mánaða), klæðast síðerma skyrtum og síðbuxum, og nota moskítónet með eða án flugnafælandi efna.

Bólusetning er virk gegn sjúkdómnum (bóluefnið Stamaril) og endist einn skammtur ævilangt.

Sóttvarnalæknir mælist til að allir sem hyggja á ferðir til Brasilíu láti bólusetja sig gegn gulusótt a.m.k. 10 dögum fyrir brottför. Ekki er mælt með bólusetningu hjá börnum yngri en 9 mánaða, þunguðum konum eða konum með barn á brjósti, einstaklingum með alvarlegt eggjaofnæmi eða ónæmisskertum einstaklingum og einstaklingum eldri en 60 ára.

Hér á landi má fá bólusetningu á heilsugæslustöðvum, hjá göngudeild sóttvarna innan heilsugæslu höfuðborgarsvæðisins og öðrum stöðum sem sjá um ferðamannabólusetningar.

Sóttvarnalæknir

<< Til baka