03.09.13

Hreyfitorg, formleg opnun og málþing 13. september nk.

Hreyfitorg

Gagnvirki vefurinn Hreyfitorg verður opnaður formlega föstudaginn 13. september kl. 14 í Íþróttamiðstöðinni Laugardal. Í tilefni opnunarinnar verður á sama tíma haldið málþingið „Þjálfun almennings - ábyrg þjónusta, upplýst val“.

Embætti landlæknis hefur haft umsjón með uppbyggingu Hreyfitorgs, en aðrir aðstandendur vefjarins eru Íþrótta- og Ólympíusamband Íslands, Félag sjúkraþjálfara, Íþróttakennarafélag Íslands, Læknafélag Íslands, Reykjalundur, Ungmennafélag Íslands og VIRK starfsendurhæfingarsjóður.

Meginmarkmið Hreyfitorgs er að auðvelda þeim sem leita eftir þjónustu fyrir sig eða aðra, t.d. foreldrum og ýmsu fagfólki, að finna hreyfingu sem samræmist getu og áhuga viðkomandi einstaklings og stuðlar að heilbrigði og vellíðan. Hreyfitorg er þannig m.a. ætlað að styðja við uppbyggingu kerfis um ávísun á hreyfingu (Hreyfiseðils).

Þjónustuaðilar sem bjóða upp á hreyfingu sem samræmist markmiðum Hreyfitorgs geta sótt um að kynna sína þjónustu á vefnum, sér að kostnaðarlausu. Sérstök áhersla er á að stuðla að auknu framboði á einfaldri og ódýrri hreyfingu sem flestir ættu að geta stundað.

Opnun Hreyfitorgs fer fram í upphafi málþingsins, sem stendur frá kl. 14:00 – 16:15. Þátttaka er án endurgjalds en skrá þarf þátttöku hér á vef Embættis landlæknis.

Skráning

Dagskrá opnunar og málþings (PDF)

Gígja Gunnarsdóttir
verkefnisstjóri hreyfingar

<< Til baka