Ný skýrsla um tóbaksneyslu á Íslandi

Framkvæmd var símakönnun í mars og apríl 2012 til að kanna tóbaksneyslu Íslendinga. Um hefðbundna könnun á tíðni reykinga var að ræða en ítarleg könnun á notkun reyklauss tóbaks var einnig gerð.

Úrtak karla var óvenjustórt eða ¾ hlutar þátttakenda vegna spurninga um notkun reyklauss tóbaks í nef og munn. Niðurstöðurnar staðfesta lækkandi tíðni daglegra reykinga á Íslandi hjá báðum kynjum sem mældist 14.2%. Lágt hlutfall karla taka daglega í nefið eða 1.9% og 3.1% sjaldnar en daglega. Hærra hlutfall tekur tóbak daglega í vörina eða 3% og 1% tekur sjaldnar en daglega í vörina.

Niðurstöður könnunarinnar sýna að töluvert sé um að ungir karlmenn bæði reyki og taki tóbak í vör. Út frá niðurstöðum um magn tóbaksnotkunar og þróun á sölu neftóbaks má ætla að stærstur hluti framleiðslu ÁTVR á íslensku neftóbaki sé notaður í vör.

Lesa má nánar um niðurstöður könnunarinnar í Talnabrunni, fréttabréfi landlæknis um heilbrigðisupplýsingar: 

Talnabrunnur. 6. árg. 5. tbl. Júní 2012 (PDF)

Skýrslan á vef embættisins: 

Tóbakskönnun mars-apríl 2012 (PDF)

Viðar Jensson
verkefnisstjóri