Áhrifaþættir hamingju Íslendinga
Í dag kynnti Dóra Guðrún Guðmundsdóttir, sviðstjóri hjá Embætti landlæknis, niðurstöður rannsóknar á áhrifum efnahagsþrenginga á hamingju Íslendinga. Niðurstöðurnar byggja á grein sem birtist nýverið í Social Indicators Research*
Helstu niðurstöður eru þær að náin tengsl við aðra og gæði sambands við fjölskyldu og vini spá best fyrir um hamingju. Tekjur skýra minna en 1% af hamingju Íslendinga en það að eiga erfitt með að ná endum saman spáir einna helst fyrir um óhamingju.
Á síðustu áratugum hefur Ísland verið með hamingjusömustu þjóðum í heimi. Eftir hrun bankanna dró lítillega úr hamingju Íslendinga en á síðustu mánuðum hefur dregið úr henni enn frekar.
Nærtækasta skýringin á minni hamingju Íslendinga er sú að verulega hefur fjölgað í hópi þeirra sem eiga erfitt með að ná endum saman.
Um helmingur þeirra sem eru á aldrinum 25-54 ára á erfitt með að ná endum saman. Af þeim sem eiga mjög erfitt með að ná endum saman eru flestir í tekjulægsta hópnum. Þó skal taka fram að 14% þeirra sem eru í tekjulægsta hópnum eiga auðvelt með að ná endum saman og 25% af þeim sem hafa meira en milljón í fjölskyldutekjur á mánuði eiga erfitt með að ná endum saman.
Í framhaldi af kynningunni voru uppbyggilegar pallborðsumræður um það hvernig samfélag stuðlar að hamingju og velferð. Þar var komið inn á mikilvægi þess að beina sjónum að því jákvæða í okkar samfélagi, að hlúa vel að félags- og tilfinningaþroska barna, vinna að því að allir hafi aðgang að einhverju félagslegu tengslaneti og koma í veg fyrir að þeir sem eiga vel að geta séð fyrir sér sjálfir nái ekki endum saman.
Þátttakendur í pallborði voru: Guðbjartur Hannesson velferðarráðherra, Lára Björnsdóttir, formaður velferðarvaktarinnar, Þórólfur Þórlindsson prófessor ásamt Dóru Guðrúnu Guðmundsdóttur.
Héðinn Svarfdal Björnsson
verkefnisstjóri
* The Impact of Economic Crisis on Happinessxt (pdf)
Hamingja og efnahagur (PDF)