Landlæknisembættið - Directorate of Health

1. grein
Þroskaþjálfi beitir fagþekkingu sinni í því skyni að bæta lífsskilyrði og lífsgæði skjólstæðinga sinna. Virðing og umhyggja fyrir skjólstæðingum og aðstandendum þeirra skal vera grunnur í starfi þroskaþjálfa.

2. grein
Þroskaþjálfi skal ávallt standa vörð um réttindi skjólstæðinga sinna. Hann skal rækja starf sitt af samviskusemi, óháð þjóðerni, kynþætti, trúarbrögðum, litarhætti, kynferði og þroskastigi skjólstæðingsins. Þroskaþjálfi skal bera virðingu fyrir lífaldri skjólstæðingsins, einkalífi hans og eignum.

3. grein
Þroskaþjálfi er bundinn þagnarskyldu varðandi upplýsingar um skjólstæðinga, hvaða formi sem þær eru skráðar. Þær skulu geymdar þannig að óviðkomandi hafi ekki aðgang að þeim. Séu persónulegar upplýsingar um skjólstæðing notaðar sem fræðsluefni skal fá til þess leyfi frá skjólstæðingi og / eða aðstandendum hans og skal þá nafnleyndar gætt sé þess óskað.

4. grein
Þroskaþjálfi skal einungis taka að sér starf eða ráðgjöf sem hæfir menntun hans. Hann skal leitast við að veita þjónustu samkvæmt ströngustu faglegum kröfum. Þroskaþjálfa ber skylda til að viðhalda þekkingu sinni.

5. grein
Þroskaþjáli skal jafnan sýna drengskap í samskiptum við starfsfélaga. Honum ber að forðast hvaðeina sem rýrt getur álit almennings á starfi þroskaþjálfa eða skert hagsmuni stéttarinnar.

6. grein
Þroskaþjálfi skal leita aðstoðar annarra sérfræðinga ef þörf er á. Hann skal virða sérþekkingu annarra faghópa og nota sérþekkingu sína til að ráðleggja öðrum.

7. grein
Þroskaþjálfi skal gæta þess að starfsákvæði séu í samræmi við samninga og samþykktir viðurkenndar af  *Félagi þroskaþjálfa.

8. grein
Þroskaþjálfi skal kynna sér og starfa eftir þeim lögum og reglugerðum sem í gildi eru hverju sinni um málefni fatlaðra og þroskaþjálfastéttina sjálfa, svo og eftir öðrum þeim lögum og reglugerðum sem varða starf hans.

9. grein
Verði þroskaþjálfi þess var að starfsfélagi hafi brotið siðareglur ber honum að ræða brotið við viðkomandi. Sé það árangurslaust ber að tilkynna brotið til siðanefndar  * Félags þroskaþjálfa.

10. grein
Siðareglur þessar ber ekki að skoða sem tæmandi lýsingu á góðum starfsháttum þroskaþjálfa. Þroskaþjálfi skal ávallt auðsýna umhyggju og bæta dómgreind sína í samræmi við aðstæður.

Siðanefnd
Frá því siðareglur voru samþykktar hefur siðanefnd verið starfandi hjá félaginu. Starfsreglur voru settar fyrir nefndina og fara þær hér á eftir:

A. Skipan í siðanefnd
Stjórn félagsins tilnefnir í siðanefnd, sem kosin skal á aðlafundi. Í siðanefnd skulu sitja 3 þroskaþjálfar. Leitast skal við að þeir séu af mismunandi starfsvettvangi. Varamenn skulu kosnir jafnmargir og með sömu skilyrðum.
Kjörtímabil fulltrúa í siðanefnd skal vera þrjú ár. Endurkosning er heimil, en þó ekki lengur en tvö tímabil samfellt.

Til að þroskaþjálfi teljist hæfur til setu í siðanefnd þarf hann að hafa óflekkað mannorð og hafa starfað sem þroskaþjálfi að minnsta kosti í 5 ár. Þroskaþjálfi sem kosinn er  í siðanefnd skal ekki sitja í stjórn eða öðrum nefndum Þroskaþjálfafélags Íslands.

Telji stjórn Þroskaþjálfafélags Íslands, málsaðili eða nefndarmaður að um vanhæfni nefndarmanns geti verið að ræða í ákveðnu máli skal sá víkja, en varamaður taka sæti hans.

Siðanefnd starfar sjálfstætt og óháð stjórn og öðrum nefndum félagsins.

B. Hlutverk siðanefndar
Siðanefnd úrskurðar um kærur sem henni berast um brot á siðareglum Þroskaþjálfafélags Íslands eins og þær eru hverjum tíma.

Siðanefnd fundar eins oft og þurfa þykir, þó ekki sjaldnar en fjórum sinnum á ári og skal hún halda gjörðabók yfir alla fundi sína.

Siðanefnd skal standa fyrir siðferðilegri umræðu innan Þroskaþjálfafélags Íslands.

Kærur til siðanefndar skulu vera skriflegar og berast til skrifstofu Þroskaþjálfafélags Íslands.

Siðanefnd getur tekið upp mál að eigin frumkvæði.

Siðanefnd tekur mál fyrir í þeirri röð sem þau berast.

Siðanefnd kannar hvort einhver nefndarmanna sé vanhæfur til að fjalla um tiltekið kærumál vegna tengsla við kæranda eða kærða. Úrskurður nefndarinnar er endanlegur.

Við upphaf málsmeðferðar kannar siðanefnd hvort þeim kröfum sem siðareglur gera til kæranda hafi verið fullnægt. Sé svo ekki skal kæru vísað frá og kæranda skýrt skriflega frá orsökum frávísunar.

Siðanefnd skal bjóiða öllum málsaðilum að skýra mál sitt á fundum nefndarinnar. Hún skal einnig óska eftir skriflegri greinargerð allra aðila.

Siðanefnd ákveður hverjir skuli koma fyrir nefndina og hvaða viðbótatgagna skuli aflað.

Siðanefnd kveður upp rökstuddan skriflegan úrskurð og ritar fullskipuð undir úrskurði. Sératkvæði skulu birt með úrskurði minnihlutans. Ef um alvarlegt brot er að ræða skal siðanefnd vísa málinu áfram til landlæknis.

Siðanefnd nafngreinir ekki í úrskurði sínum kæranda eða aðra aðila máls ef hún telur að nafnabirting valdi óþægindum  eða sársauka.

Siðanefnd úrskurðar í kærumálum eftir ákvæðum siðareglanna og með hliðsjón af eldri úrskurðum.

Siðanefnd fer með gögn mála, önnur en kæru og úrskurð nefndarinnar, sem trúnaðarmál og fjallar ekki um einstök mál opinberlega. Gögn skal geyma í 10ár.

Í upphafi voru fulltrúar kosnir þannig að einn fulltrúi var kosinn til 1. árs, einn til 2. ára og einn til 3. ára. 

Uppfært 4. nóvember 2008