Samsett hormónameðferð
Eins og menn mun reka minni til var viðamikil bandarísk rannsókn (Womens Health Initiative) á áhrifum hormónagjafar við og eftir tíðahvörf stöðvuð í júlí í sumar þegar niðurstöður bentu til þess að hættan af samfelldri samsettri hormónameðferð væri meiri en ávinningurinn (sbr. frétt á vefsetri Landlæknisembættisins, dags. 15.07.02).
Í ljósi ofangreindra niðurstaðna vill landlæknir ítreka þau tilmæli að ástæða er til að endurskoða hormónameðferð hvort sem hún er samsett, stöðug eða kaflaskipt.
Þrjár meginábendingar hafa verið í gildi fyrir hormónameðferð af þessu tagi, einkenni við tíðahvörf, forvörn eða meðferð við beinþynningu og loks möguleg vörn við hjarta- og æðasjúkdómum. Ábendingar þessar geta nú hafa breyst.
Samsetta hormónameðferð á ekki að nota lengur til að koma í veg fyrir eða meðhöndla hjarta- og æðasjúkdóma. Meðferð tíðahvarfaeinkenna eða meðferð/forvarnir við beinþynningu á einnig sjaldnar rétt á sér en áður vegna fylgikvilla meðferðar. Því eru þau tilmæli ítrekuð að endurskoða meðferð af þessu tagi hjá þeim konum sem hennar njóta og að konan sé upplýst um kosti og galla meðferðarinnar og að ákvörðun í þessu efni eins og svo mörgu öðru sé sameiginleg ákvörðun læknis og sjúklings.
Heimildir:
1. Writing Group for the Womens Health Initiative Investigators. Risks and benefits of estrogen plus progestin in healthy postmenopausal women. Principal results from the Women´s Health Initiative randomized controlled trial. JAMA 2002;288:321-333
2. New Zealand Guideline Group. Best practice evidence-based guidelines for the appropriate prescribing of hormone replacement therapy. Updated on 30 September 2002. http://www.nzgg.org.nz/
3. Beral V. Banks E, Reeves G. Evidence from randomised trials on the long-term effects of hormone replacement therapy. Lancet 2002;360:942-944.
10. október 2002
Landlæknir
Uppfært 17. apríl 2007