Landlæknisembættið - Directorate of Health

Íslendingar gerðust aðilar að Schengen-samningnum 25. mars 2001. Í 75. grein samningsins er gert ráð fyrir að þeir sem vegna sjúkdóma þurfa að hafa meðferðis lyf sem innihalda ávana- og fíkniefni milli Schengen-landa* þurfi að geta framvísað samræmdu eyðublaði sem gildir innan alls Schengen-svæðisins.

Eyðublaðið er á íslensku, ensku og frönsku. Vottorðið skal útfyllt, í reiti 2–21, af þeim lækni sem ávísaði lyfjunum og útfylltu vottorði síðan komið til skrifstofu landlæknis sem staðfestir það með undirskrift og stimpli embættisins. Vottorðið gildir í 30 daga og þarf að útfylla eyðublað fyrir hvert lyf sem haft er meðferðis.

Vakin er athygli á því að ferðamaður skal hafa frumrit vottorðsins meðferðis en ljósrit er geymt hjá Landlæknisembættinu.
Þar til lyfjalistar Schengen-landa hafa verið samræmdir verður einkum fylgst með lyfjum er innihalda efni sem eru eftirritunarskyld hérlendis.

Lista yfir þau efni má nálgast á vef Lyfjastofnunar.

Heilbrigðisráðuneytið hefur gefið út tvær reglugerðir vegna þessara breytinga, önnur er breyting á reglugerð númer 212/1998 um innflutning einstaklinga á lyfjum til eigin nota og hin er um ávana- og fíkniefni og önnur eftirlitsskyld efni, númer 233/2001. Reglugerðir þessar eru aðgengilegar á vefjum Heilbrigðisráðuneytisins og Lyfjastofnunar.

Schengen lyfjavottorð. Eyðublað (PDF)
* Evrópusambandslönd sem eiga fulla aðild að Schengen-svæðinu eru: Austuríki, Belgía, Danmörk, Finnland, Frakkland, Grikkland, Holland, Ítalía, Lúxemborg, Portúgal, Spánn, Svíþjóð og Þýskaland (en ekki Írland og Bretland). Að auki eiga Ísland og Noregur (sem ekki tilheyra Evrópusambandinu) aðild að Schengen-samningnum. Ríkin 12 sem hafa gengið í ESB síðan 2004 eiga ekki fulla aðild að Schengen enn sem komið er.