Úrsagnaskrá lífsýnasafna
Ábyrgðaraðili: Landlæknir
Vinnsluaðili: Landlæknir
Tilgangur: Að safna í eina skrá kennitölum þeirra einstaklinga sem afturkallað hafa ætlað samþykki sitt fyrir því að lífsýni þeirra séu vistuð í lífsýnasafni til notkunar við vísindarannsóknir sbr. lög nr. 110/2000. Þannig geta ábyrgðaraðilar vísindarannsókna séð til þess að viðkomandi sýni séu ekki notuð í slíkum tilgangi.
Innihald: Gögn um einstaklinga sem lagt hafa bann við því að lífsýni sem tekin eru úr þeim vegna þjónusturannsókna séu nýtt til vísindarannsókna eða vistuð í lífsýnasafni í því skyni.
Tímabil: Skráð hefur verið í grunninn frá árinu 2001.
Uppruni gagna: Úrsagnareyðublöð sem einstaklingar senda inn. Úrsagnir þurfa að berast á pappír og vera undirritaðar af einstaklingnum sjálfum eða forráðamanni.
Skráningaratriði: Nafn, kennitala og lögheimili þeirra einstaklinga sem sent hafa úrsagnarbeiðni til landlæknis eru vistuð á dulkóðuðu formi í grunninum, ásamt dagsetningu beiðninnar.
Sambærileg eða skyld gagnasöfn: Úrsagnarskrá vegna gagnagrunns á heilbrigðissviði.
Úrvinnsla og birting: Árlega eru birtar tölur yfir fjölda þeirra sem skráðir eru í úrsagnagrunninn.
Saga: Lög um lífsýnasöfn, nr. 110/2000, kveða á um að einstaklingur, sem úr hefur verið tekið lífsýni til þjónusturannsókna, geti hvenær sem er afturkallað ætlað samþykki sitt fyrir því að sýni úr honum verði vistað í lífsýnasafni til notkunar við vísindarannsóknir. Skal slík ósk vera tilkynnt landlækni og á hann samkvæmt lögunum á að halda úrsagnaskrá. Úrsagnargrunnur vegna lífsýnasafna var smíðaður árið 2001.
Uppfært 18. desember 2008