Aðgengi að heilbrigðisþjónustu
Landlæknisembættið fylgist með aðgengi að heilbrigðisþjónustu, m.a. með upplýsingum um biðlista.
Biðlistaupplýsingum hefur verið safnað reglulega frá júni 2007, þrisvar sinnum á ári í febrúar, júni og október. Innköllun og birting biðlistaupplýsinga er á stöðluðu formi og byggir á upplýsingum um fjölda einstaklinga sem bíður eftir að komast í valdar aðgerðir. Frá því í október 2008 hefur einnig verið óskað eftir upplýsingum um áætlaðan biðtíma eftir völdum aðgerðum. Biðtími er gefinn upp í heilum vikum og gefur til kynna mat stjórnenda viðkomandi sjúkrahúsa á því hvað sjúklingur, án fylgikvilla, gæti þurft að bíða að hámarki eftir tiltekinni aðgerð.
Upplýsingar um áætlaðan biðtíma eftir aðgerðum á hverri stofnun og fjöldi framkvæmdra aðgerða gefur vísbendingar um aðgengi sjúklinga að heilbrigðisþjónustunni.
Til að auka notagildi upplýsinganna er stefnt að því að birta fréttir af biðtíma nær þeim tímapunkti, sem miðað er við.
Gerð var könnun á fjórum stofnunum á biðlistum eftir endurhæfingarþjónustu að beiðni heilbrigðisráðuneytisins árið 2006. Þá er vistunarmatsskráin í raun biðlisti eftir hjúkrunarrýmum og hefur embættið gert kannanir meðal þeirra sem eru á biðlista í Hafnarfirði og Reykjavík í samstarfi við ráðuneytið.
Til að leggja mat á aðgengi að íslensku heilbrigðisþjónustunni var framkvæmd viðamikil rannsókn haustið 1998 í samstarfi Háskóla Íslands og Landlæknisembættisins undir stjórn Rúnars Vilhjálmssonar prófessors. Rannsóknin byggir á landsúrtaki 1924 einstaklinga á aldrinum 18–75 ára. Niðurstöðurnar bentu til að um verulegan mun væri að ræða á aðgengi að heilsugæslu milli hópa. Munur virðist vera á aðgengi eftir aldri, kyni, búsetu, stöðu á vinnumarkaði og tekjum. Sambærileg rannsókn var gerð aftur árið 2006.
Rannsóknir Háskóla Íslands og Landlæknisembættisins
Uppfært 5. febrúar 2009