Landlæknisembættið - Directorate of Health

Oft er sagt að slysin geri ekki boð á undan sér. Það er hins vegar ekki alls kostar rétt. Þegar orsakir slysa eru skoðaðar kemur í ljós að koma hefði mátt í veg fyrir mörg þeirra ef rétt hefði verið búið um hnútana í fyrstu. Slys verða jú oftar en ekki vegna mannlegra mistaka. Slys er ekki sjálfstæður atburður heldur er hann síðastur í röð atburða sem allir hafa orsakir og afleiðingar. Þannig orsakast slys venjulega af samspili margra þátta og ef hægt er að koma í veg fyrir einn eða fleiri af þessum þáttum má oft koma í veg fyrir þau.

Landlæknisembættið áætlar að á tímabilinu 2000–2005 hafi um 50 þúsund slys orðið á landinu á ári hverju. Slys valda slösuðum og aðstandendum oft og tíðum miklu tjóni, bæði líkamlegu og sálrænu. Þjóðfélagið í heild ber auk þess mikinn kostnað af slysum, bæði í formi vinnutaps þess slasaða og aðstandenda sem og beins kostnaðar í heilbrigðiskerfinu vegna þjónustu við hinn slasaða.