Næring

Grænmeti og ávextir

Starfsemi Embættis landlæknis á sviði næringar skiptist í ráðgjöf, fræðslu, heilsueflingarverkefni og rannsóknir.

Holl og fjölbreytt fæða er mikilvæg fyrir heilsu og vellíðan. Meginmarkmið starfsins er að stuðla að æskilegri þróun á mataræði landsmanna í samræmi við ráðleggingar um mataræði og næringarefni. Áhersla er lögð á að auka neyslu grænmetis, ávaxta og fisks og minnka neyslu á sykri, mettaðri fitu og salti.

Embættið vinnur fræðsluefni um næringu fyrir alla aldurshópa: Barnshafandi konur, börn, unglinga og ungt fólk, fullorðna og eldra fólk. Þetta efni er til notkunar í skólum, á heilbrigðisstofnunum, innan fyrirtækja og fyrir almenning.

Á vegum Embættis landlæknis eru unnar landskannanir á mataræði fullorðinna og þar fer einnig fram vöktun á mataræði í samvinnu við önnur Norðurlönd. Þar er enn fremur safnað tölfræðilegum upplýsingum um neyslu og sölu matvara í landinu ár hvert, s.k. fæðuframboðstölum, sem birtar eru á vef embættisins.

Embættið á í samstarfi við innlendar og erlendar rannsóknarstofnanir, háskóla og heilbrigðisstofnanir um rannsóknir á sviði næringar og heilsu.

Embætti landlæknis er faglegur ráðgjafi stjórnvalda um næringarmál og birtir ráðleggingar um mataræði og næringarefni í samvinnu við helstu sérfræðinga á sviði næringar hér á landi. Embætti landlæknis er einnig í samstarfi við skóla, fyrirtæki, stofnanir og félagasamtök um heilsueflingu á sviði næringar.

Síðast uppfært 11.11.2015