Fræðslufundur 9. maí 2003
|
Til fundarins var boðið starfsfólki í heilbrigðisþjónustu til að fræðast um það sem efst hefur verið á baugi í starfi embættisins að undanförnu og það sem framundan er. Var fundurinn vel sóttur og sátu hann á annað hundrað manns.
Sigurður Guðmundsson landlæknir setti fundinn, en fundarstjórar voru Guðrún Kristín Guðfinnsdóttir verkefnisstjóri, Sigríður Haraldsdóttir sviðsstjóri, Haraldur Briem sóttvarnalæknir og Þórarinn Gunnarsson skrifstofustjóri. Haukur Valdimarsson aðstoðarlandlæknir sleit fundi og boðaði til sambærilegs fræðslufundar að ári.
Í dagskrá fundarins kenndi margra grasa og endurspegluðu erindin hið fjölþætta starf sem unnið er hjá Landlæknisembættinu. Eftirfarandi erindi voru flutt:
Eftirlit með lyfjaávísunum lækna: Haukur Valdimarsson aðstoðarlandlæknir
Eitt af hlutverkum landlæknis er að hafa eftirlit með ávísunum lækna á lyf. Fyrir u.þ.b. ári varð mikil umræða í samfélaginu um þetta eftirlit og kom þá m.a. fram að því væri í ýmsu tilliti ábótavant. Vinna við endurskoðun og úrbætur leiddi til þess að á síðasta þingi voru samþykktar breytingar á lyfja- og læknalögum sem miða að því að gera þetta eftirlit markvissara. Í fyrirlestrinum var m.a. fjallað um þessar breytingar og á hvern hátt ætlað er að vinna í þessum málum næstu árin.
Skoða glærur
Lýðheilsumál: Sigurður Guðmundsson landlæknir
Fjallað var um ýmsa þætti lýðheilsu á Íslandi, áhrif samfélags á heilsufar, nauðsyn lýðheilsuskóla og samvinnu Landlæknisembættisins og nýrrar Lýðheilsustöðvar.
Skoða glærur
Skráning í heilbrigðisþjónustu ? Hvað er efst á baugi? Sigríður Haraldsdóttir, sviðsstjóri heilbrigðistölfræðisviðs
Fjallað var um hlutverk Landlæknisembættisins varðandi skráningu og gagnasöfnun í heilbrigðisþjónustu og þau verkefni sem verið er að vinna að hjá embættinu. Rætt um aðgengi að heilbrigðistölfræði, aðferðir til þess að bæta það og nauðsyn þess að ýta undir betri nýtingu upplýsinga.
Skoða glærur
Klínískar leiðbeiningar: Sigurður Helgason, ritstjóri klínískra leiðbeininga
Í erindinu var sagt frá fagráði um ungbarnavernd og fjallað um endurskoðun leiðbeininga, sérstaklega þroskamat við 3½ og 5 ára aldur. Gerð var grein fyrir helstu áherslum á sviði ungbarnaverndar og mikilvægi samstarfs stofnana innan og utan heilbrigðisþjónustunnar til að tryggja gæði þjónustunnar.
Geðheilbrigðismál barna. Er svigrúm fyrir sálartetrið? Salbjörg Bjarnadóttir verkefnisstjóri
Farið var yfir helstu þætti sem geta valdið geðröskunum hjá börnum og mikilvægt hlutverk fjölskyldu og samfélags. Fjallað var um úrræði í heilbrigðis- og félagsþjónustu og nauðsyn á samvinnu foreldra, skólans, heilsugæslu og félagsþjónustu þegar börn veikjast. Loks greint frá heppilegum leiðum til að efla sjálfstraust og vellíðan barna.
Skoða glærur
Heimafæðingar: Vilborg Ingólfsdóttir yfirhjúkrunarfræðingur
Fjallað var um vaxandi áhuga á heimafæðingum á undanförnum árum og nýstofnaðan ráðgjafahóp Landlæknisembættisins um heimafæðingar. Í erindinu var farið yfir þróun fæðinga í heimahúsum hér á landi og erlendis og rakin fagleg tilmæli landlæknis um heimafæðingar, þ.á m. um frábendingar, hverjum er ráðlagt að fæða hvar og hvaða verklag og þjónusta þarf að standa heimafæðandi konum til boða.
Árangur bólusetninga gegn meningókokkum C; Næstu skref í barnabólusetningum: Þórólfur Guðnason yfirlæknir
Bólusetning gegn meningókokkum C hófst á Íslandi þann 15. október 2002 og hefur framkvæmd bólusetningarinnar verið í höndum heilsugæslunnar. Þann 8. maí 2003 var búið að bólusetja a.m.k. 78% barna og unglinga á aldrinum 6 mánaða til og með 19 ára. Frá því bólusetningin hófst hafa greinst 3 tilfelli á Íslandi með meningókokkasjúkdóm (tvö tilfelli með hjúpgerð C, eitt með hjúpgerð B) og virðist hafa orðið veruleg fækkun á tilfellum með meningókokka C. Er það í samræmi við reynslu annarra þjóða sem bólusetja gegn þessum sjúkdómi. Á næstu árum þarf að taka afstöðu til þess hvort taka eigi upp almenna bólusetningu gegn hlaupabólu og pneumókokkum hér á landi.
Skoða glærur
Heilkenni alvarlegrar bráðrar lungnabólgu - HABL: Guðrún Sigmundsdóttir læknir
Í erindinu var upphaf og útbreiðsla HABL rakin frá því fyrstu tilfelli greindust í Guangdonghéraði í Kína um miðjan nóvember 2002. Smitleiðir og einkenni sjúkdómsins reifuð og fjallað um batahorfur þeirra sem veikjast. Gerð var grein fyrir viðbrögðum Alþjóðaheilbrigðismálastofnunarinnar til að stemma stigu við útbreiðslu HABL svo og tilmælum og viðbragðaáætlun sóttvarnalæknis.
Hugleiðingar um lögleiðingu fíkniefna: Sigurður Guðmundsson landlæknir
Rakin nokkur atriði sem upp hafa komið í umræðu um lögleiðingu kannabis. Eindregið lagst gegn slikum hugmyndum hérlendis í ljósi nýrrar þekkingar um langvarandi áhrif kannabis á heilastarfsemi og þess að engin rök eru fyrir því að Ísland verði vettvangur slíkrar þjóðfélagstilraunar.
Skoða glærurSjálfsvíg - forvarnir og eftirfylgd: Salbjörg Bjarnadóttir verkefnisstjóri
Skoða glærur
Fjallað um upplýsingar um vaxandi tíðni ofbeldis í samfélaginu, afleiðingar þess, bæði félagslegar og heilsufarslegar. Rætt um skyldu heilbrigðisstarfsmanna að greina frá misnotkun á börnum ef grunur kemur upp.
Fjallað um skyldur Landlæknisembættisins skv. lögum til að hafa faglegt eftirlit með heilbrigðisstofnunum og hvernig því eftirliti er hagað. Skýrt frá niðurstöðum úr könnunum embættisins á fimm sjúkrahúsum og öðrum heilbrigðisstofnunum, sem taka m.a. til viðhorfs stjórnenda og starfsfólks og gæða þjónustunnar frá sjónarhóli neytenda. Einnig rætt um eftirfylgd í kjölfar slíkra kannana.
Ábyrgð heilbrigðisstarfsmanna: Sigurður Guðmundsson landlæknir
Fjallað var um ábyrgð heilbrigðisstarfsmanna á eigin starfi, ábyrgð sem ekki verður vísað annað. Rakin helstu ákvæði í lögum um réttindi sjúklinga um framkomu við sjúklinga og gagnkvæma virðingu.
Skoða glærur
Uppfært 4. mars 2007