Landlæknisembættið - Mataræði

Mataræði - þyngdin

Nútímalæknavísindi hafa með ítarlegum rannsóknum sýnt fram á að til þess að varðveita heilsu sína þarf fólk að gæta að því hvað það leggur sér til munns og fá næga og holla hreyfingu. Þetta tvennt helst í hendur. Mataræði og regluleg hreyfing eru hvorttveggja þættir sem fólk getur sjálft ráðið miklu um og þannig haft jákvæð áhrif á eigið heilsufar.

Af þessum sökum voru mataræði og hreyfing fyrsta viðfangsefnið á dagskrá hvatningar- og fræðsluverkefnis Landlæknisembættisins sem hóf göngu sína í ársbyrjun 2002 og hefur staðið óslitið síðan. Verkefnið fór af stað með átaki í samstarfi við Manneldisráð, sem nú er eitt af sérfræðiráðum Lýðheilsustöðvar, Sjúkraþjálfunarskor Háskóla Íslands, Ísland á iði 2002 og Íþróttafræðasetur Kennaraháskóla Íslands á Laugarvatni og var þá m.a. haldin ráðstefna um hreyfingarleysi og offitu á Hótel Loftleiðum 21. mars 2002.

Margs konar fróðleikur um áhrif mataræðis og hreyfingar á líðan og heilsu hefur safnast upp á undanförnum árum á vefsíðum þessum. Við endurskoðun vefsetursins í ársbyrjun 2007 var ákveðið að skipta greinum um þessi efni í tvo efnisflokka til hægðarauka, undir heitunum Mataræði og þyngdin annars vegar og hins vegar Hreyfing.

Greinarnar hafa birst í vikulegum pistlum á síðum Morgunblaðsins, þær elstu birtust sem Hollráð á þemamánuðum Landlæknisembættisins árið 2000. Greinunum er raðað hér fyrir neðan í tímaröð eftir birtingu þeirra í Morgunblaðinu, þeim nýjustu efst.