Landlæknisembættið - Directorate of Health

Gæði og öryggi í heilbrigðisþjónustu eru nú í brennidepli víða um heim. Þessi tvö hugtök eru nátengd, því öryggi þjónustunnar hefur mikil áhrif á gæði hennar. Það er fagleg, lagaleg og siðferðileg skylda heilbrigðsstétta að veita framúrskarandi heilbrigðisþjónustu, sbr. lög um heilbrigðisþjónustu, lög um landlækni, lög um réttindi sjúklinga og siðareglur heilbrigðisstétta.

Landlæknisembættið hefur lögum samkvæmt það hlutverk að efla gæði og öryggi heilbrigðisþjónustunnar og hafa eftirlit með henni. Til þess að sinna þessu hlutverki gefur embættið m.a. út tilmæli, viðmið og leiðbeiningar, fylgist með því að faglegar kröfur hvarvetna í heilbrigðisþjónustunni séu uppfylltar og hefur eftirlit með heilbrigðisstofnunum og heilbrigðisstarfsfólki. Í þessu skyni velur embættið einnig tiltekna gæðavísa sem sýna gæði og öryggi á mælanlegan hátt.   Lesa meira á síðunni Gæðavísar

Gæðaeftirlit
Eitt af hlutverkum Landlæknisembættisins er að hafa eftirlit með starfsemi heilbrigðisstofnana og starfsaðstöðu heilbrigðisstétta. Undir eftirlit landlæknis heyra mörg hundruð rekstrareiningar. Unnið hefur verið að því að gera þetta eftirlit markvissara og skipulagðara. Við úttektir á heilbrigðisstofnunum eru notaðar kannanir meðal notenda heilbrigðisþjónustunnar, stjórnenda og starfsfólks. Einnig er farið yfir fyrirliggjandi tölulegar upplýsingar og kvartanir og kærur og stofnanir heimsóttar.

Eftirlit með gæðum og öryggi þjónustunnar er viðamikið verkefni sem krefst mannafla og fjármuna og sífellt þarf að ígrunda á hvern hátt því er best sinnt til að árangurinn verði góður.

Aðgerðir til að efla öryggi í heilbrigðisþjónustu
Landlæknisembættinu er kappsmál að efla gæði og öryggi í heilbrigðisþjónustu og hefur í samráði og samvinnu við ýmsa aðila gripið til margvíslegra sértækra aðgerða í þeim tilgangi. Meðal þeirra helstu eru:

• Stefnumörkun heilbrigðisyfirvalda í gæðamálum til ársins 2010. Útg. í apríl 2007 i samvinnu við  heilbrigðis- og tryggingamálaráðuneytið. 
  
  
• Stofnun fagráðs um sjúklingaöryggi
  
  
• Gæðaeftirlit
  
  
• Gerð klínískra leiðbeininga
  
  
• Gæðavísar
  
  
• Rekstur gagnasafna
  
  
• Sóttvarnir – vöktun og viðbrögð
  
  
• Barátta gegn sýkingum sem eiga uppruna í heilbrigðiskerfinu
  
  
• Rannsóknir, s.s. úttekt á tíðni óvæntra skaða, á öryggisbrag og könnun á lyfjaatvikum
  
  
• Atvikaskráning og viðbrögð við atvikum
  
  
• Aðgerðir vegna manneklu
  
  
• Málþing um öryggi í heilbrigðisþjónustu
  
  
• Vitundarvakning meðal almennings til að efla eigið öryggi í heilbrigðisþjónustu
  
  
• Áherslur í heilbrigðisþjónustu á hjúkrunarheimilum
  
  
• Faglegar lágmarkskröfur